Hanna Birna Kristjánsdóttir, fyrrverandi innanríkisráðherra, olli nokkrum fjárhagslegum skaða fyrir tímaritið MAN með því að endursegja viðtal sitt við tímaritið í Íslandi í dag. Björk Eiðsdóttir, ritstjóri MAN, segist í samtali við Stundina skiljanlega vera svekkt yfir þessu en tímaritið eyddi bæði tíma og fé í meðal annars ljósmyndun og stílista. Forsíðuviðtalið við Hönnu Birnu verður ekki birt segir Björk. Nútíminn greindi fyrstur frá málinu í dag.
„Við vorum búin að vinna viðtalið og ganga frá því þegar þetta gerist á mánudagskvöldið. Hún sagði allt, fyrirsögnina og allt. Hún segir meira að segja fyrirsögnina í viðtalinu. Auðvitað er þetta rosalega svekkjandi,“ segir Björk.
Hún segir að útgáfu tímaritsins muni ekki seinka. Hins vegar hafi þurft að seinka prentun með tilheyrandi kostnaði. Forsíðuviðtalið átti fyrst og fremst að fjalla um hennar persónulegu upplifun af lekamálinu öllu. Björk segir að Hanna Birna segist hafa lofað því að fara ekki í annað persónulegt viðtal, en búist var við að hún færi í fréttaviðtöl vegna endurkomu hennar á Alþingi.
„Það vita það allir að það er ekki hægt að birta sama viðtalið tvisvar. Við sleppum viðtalinu hennar alveg. Þú getur ímyndað hvað það kostar; myndun með stílista, ljósmyndara, sminki og hári, blaðamaður og yfirlestur. Ég var auðvitað mjög svekkt, en lofa ekki síðra forsíðuviðtali í næstu viku,“ segir Björk.
Athugasemdir