Franska lögreglan hættir sér ekki inn í fjölmörg hverfi Parísar þar sem sjaríalög heittrúaðra íslamista eru nú frönskum lögum yfirsterkari. Hið sama má segja um lögregluyfirvöld í Berlín sem forðast ákveðin hverfi borgarinnar af ótta við gengi innflytjenda sem ráða þar lögum og lofum. Raunar má finna mýmörg dæmi þess að lögregluyfirvöld um alla Evrópu hafi misst stjórn á heilu landsvæðunum í kjölfar flóttamannastraumsins til álfunnar. Á sama tíma streyma afrískir flóttamenn nú stríðum straumum frá Mexíkó og yfir landamærin til Bandaríkjanna í von um að koma sér þar fyrir áður en Donald Trump tekur opinberlega við embætti.

Aðilar sem tóku þátt í mótmælum á kosningafundi Trump hafa viðurkennt að hafa fengið greitt fyrir þátttökuna. Þá hefur verið upplýst að leiðtogar ISIS studdu við Hillary Clinton í kosningabaráttunni. Fyrrverandi starfsmaður leyniþjónustu Bandaríkjanna ljóstrar því upp í nýútkominni bók að Obama sé sjálfur herskár múslimi. Það ætti ekki að koma neinum á óvart enda skrifaði hann nýlega undir löggjöf sem bannar flutning þjóðsöngsins á íþróttaviðburðum í Bandaríkjunum. Nýjustu fréttir herma að vinstrisinnaðir andstæðingar Trump undirbúi nú efnavopnaárásir á innsetningarathöfninni þann 20. janúar næstkomandi.

Þetta eru einungis nokkur brot úr öllum þeim aragrúa falskra frétta sem finna má á netinu og fengið hafa gríðarlega dreifingu á samfélagsmiðlum síðastliðin misseri. Ekkert lát virðist á dreifingu slíkra frétta og margir búast raunar við að þeim muni fjölga enn frekar á komandi ári. Margir telja að falskar fréttir hafi haft áhrif á niðurstöður bandarísku forsetakosninganna á meðan aðrir gera lítið úr raunverulegum áhrifum þeirra. Yfirvöld í Frakklandi og Þýskalandi hafa alvarlegar áhyggjur af því að falskar fréttir muni hafa áhrif á kosningaúrslit í löndunum tveim á komandi ári. Bandarískur vefur sem dreifir fölskum fréttum hyggst opna útibú í löndunum tveimur í þeim tilgangi að sverta ímynd ráðandi afla og koma viðhorfum ysta hægrisins að í umræðunni.