Við hjónin fengum úthlutað 2,8 milljónum króna í skuldaleiðréttingu. En þegar við vildum fá þessa fjármuni reyndist það útilokað. Eina leiðin var sú að flytja heim og byrja að vinna þar,“ segir Birgir Heiðar Búason, yfirkokkur á Scandic-hóteli. Hann og eiginkona hans, Ása Karitas Arnmundsdóttir sáu ekki aðra leið til að bjarga sér eftir hrun en að flytja til Noregs.
„Ég missti vinnuna heima á Íslandi og vanskilin hlóðust upp. Við höfðum keypt hús í Hafnarfirði sem við gerðum upp. En eftir nokkurra mánaða atvinnuleysi var vandinn orðinn svo stór að ég ákvað að fara til Noregs og fara að vinna þar,“ segir Birgir Heiðar.
Á tveimur árum tókst honum að ná tökum á fjármálum sínum og greiða niður vanskilin. Fjölskyldan hafði verið sundruð þar sem eiginkonan og tveir synir þeirra hjóna bjuggu á Íslandi. Ása Karitas flutti út til eiginmannsins þar sem þau hafa búið síðan. Þau leigðu út hús sitt og héldu áfram að greiða af lánunum. Á síðasta ári seldu þau síðan húsið sitt. Svo kom skuldaleiðréttingin.
„Við sóttum um og fengum það svar að hvort okkar fengi 1,4 milljón króna. En þetta reyndist ekki vera í hendi. Þegar ég reyndi að nálgast fjármunina vandaðist málið. Þá var mér sagt að við yrðum að koma til Íslands og vinna þar. Á næstu fjórum árum kæmi þetta til baka í formi skattaafsláttar,“ segir Birgir Heiðar.
Athugasemdir