Ummæli Sigurðar Inga Jóhannssonar forsætisráðherra um að vegna jafnræðisreglu EES-samningsins sé ekki hægt að banna Íslendingum að vista peninga í lágskattaríkjum, standast ekki skoðun. Þetta kemur fram í áréttingu frá Eftirlitsstofnun EFTA. „Í umræðu um mögulegar aðgerðir til að koma í veg fyrir að eignir séu vistaðar í skattaskjólum hefur þess misskilnings gætt að slíkt stangist á við EES-samninginn. Af því tilefni vill Eftirlitsstofnun EFTA árétta að EES-samningurinn útilokar ekki að sett verði lög sem banna vistun eigna á lágskattasvæðum utan EES-svæðisins. Grunnreglan um frjálsa fjármagnsflutninga er sú að ekki séu takmarkanir á flutningi fjármagns milli ríkja sem eiga aðild að EES-samningnum. Ákvæði EES-samningsins um frjálsa fjármagnsflutninga gilda ekki um önnur ríki,“ segir í tilkynningu stofnunarinnar. 

Sigurður Ingi hélt því fram í viðtali við Morgunblaðið í gær að sitt fyrsta verk í forsætisráðuneytinu hafi verið að láta kanna hvort hægt væri að banna Íslendingum að vista peninga í lágskattaríkjum. „Fyrstu svör sérfræðinga eru þau að vegna meðal annars jafnræðisreglu EES-samningsins sé það ekki hægt. Mér hefur því þótt sérkennilegt að heyra Evrópusambandssinna, Samfylkinguna og jafnvel Pírata, sem hafa aðild að Evrópusambandinu á stefnuskrá, tala um að loka eigi á möguleika fólks að vista peningana sína á aflandseyjum. Þetta er alþjóðlegt vandamál,“ sagði Sigurður Ingi meðal annars.