Dögun kvartar undan þöggun

Fram­kvæmda­ráð Dögunar telur að flokk­ur­inn sé beittur þöggun í fjöl­miðlum. Þetta kemur fram í til­kynn­ingu sem birt­ist á vef flokks­ins um helg­ina. „Það er deg­inum ljós­ara að fjöl­miðlar hunsa flest allar álykt­anir og frétta­til­kynn­ingar frá Dögun, stjórn­mála­sam­tökum um rétt­læti, sann­girni og lýð­ræði. Þó að einum frétta­miðli und­an­skildum, net­miðl­inum Mbl.is,“ segir þar. Er fundið að því að aðrir fjöl­miðlar en Mbl.is hafi ekki fjallað um lands­fund flokks­ins. Í ljósi þessa hygg­ist flokk­ur­inn  setja á lagg­irnar eigin frétta­veitu, net­sjón­varp, og er stefnt að útsend­ingum á fyrsta árs­fjórð­ungi 2016. „Dögun hvetur blaða­menn til að fara betur með þær lýð­ræð­is­legu skyldur sem þeir hafa,“ segir í lok til­kynn­ing­ar­innar.

Dögun bauð fram í síð­ustu þing­kosn­ingum en náði ekki inn þing­manni. Samkvæmt lögum flokks­ins er til­gangur hans að „stuðla að betra sam­fé­lagi, sem hefur umburð­ar­lyndi, rétt­læti, heið­ar­leika, sið­gæði og lýð­ræði að leið­ar­ljósi. Sam­fé­lagi sem byggir á virkni og ábyrgð þegn­anna og jafn­ræði allra, óháð aldri, búsetu, kyni, efna­hag, kyn­þætti, trú­ar­brögðum, fötlun, kyn­hneigð, stöðu eða upp­runa.” Í fram­kvæmda­ráði Dögunar sitja Sigríður Fossberg Thorlacius, Ragn­hildur L. Guð­munds­dóttir, Björgvin Vídalín, Baldvin Björg­vins­son og Gunnar Hólm­steinn Ársæls­son. Formaður flokks­ins er Helga Þórð­ar­dóttir og vara­for­maður Sigurður Har­alds­son.