„Það sem þið sjáið hér eru bleikar hendur,“ sagði Bjarni Benediktsson forsætisráðherra á fundi með stjórnendum UN Women í New York í gær í tilefni af alþjóðlegum baráttudegi kvenna. 

Bjarni er þar sem fulltrúi Íslands vegna þess að Ísland er eitt af tíu ríkjum þar sem hæst hlutfall karlmanna skrifaði nafn sitt undir yfirlýsingu vegna jafnréttisátaksins HeForShe. Hann er titlaður einn af málsvörum HeForShe, einn tíu þjóðarleiðtoga.

Bjarni greindi frá því á fundinum í gær að hann væri með bleikar hendur vegna matarlitar sem hann hafði notað við að skreyta köku með merki He for She. „Þetta er ekki vegna þess að ég hafi fjarlægt naglalakk af höndunum á mér, þetta er vegna einhvers sem mér finnst gaman að gera, og ég gerði í gærkvöldi, sem var að baka köku. Þetta var úr matarlitnum fyrir sykurmassann.“ 

Í tilkynningu frá forsætisráðuneytinu kemur fram að Bjarni hefði afhent Elizabeth Phumzile, framkvæmdastýru UN Women, kökuna sem hann skreytti, á fundinum.  

„Auk þess að ræða mikilvægi þess að brjóta niður staðalímyndir og að virkja karla í jafnréttisbaráttunni, lagði forsætisráðherra áherslu á launajafnrétti kynjanna og mikilvægi jafnlaunastaðalsins í þeim aðgerðum,“ segir í tilkynningu ráðuneytisins.

Jafnréttismál í ólestri í flokki Bjarna

Bjarni hefur verið gagnrýndur á Íslandi fyrir að hafa ekki tekið afstöðu með jöfnu kynjahlutfalli á Alþingi. Kynjahlutföll þingmanna stjórnmálaframboða á Alþingi eru nokkuð jöfn, en í Sjálfstæðisflokknum eru konur aðeins þriðjungur þingmanna. Þar sem konur eru 47,6 prósent þingmanna er ljóst að munurinn liggur í Sjálfstæðisflokknum.

Allir flokkar fyrir utan Sjálfstæðisflokkinn höfðu reglur eða viðmið um kynjahlutföll á listunum sínum. Í kjölfar prófkjara Sjálfstæðisflokksins sögðu þrír formenn Landssambands sjálfstæðiskvenna, þáverandi og fyrrverandi, sig úr flokknum. Í yfirlýsingu frá Helgu Dögg Björgvinsdóttur, Jarþrúði Ásmundsdóttur og Þórey Vilhjálmsdóttur kom fram að þær hefðu gefist upp á að breyta íhaldssömum viðhorfum í flokknum. „Nú teljum við full­reynt að hreyfa við þeim íhalds­sömu skoð­unum og ­gildum sem ríkja um jafn­rétt­is­mál í Sjálf­stæð­is­flokkn­um. Ýmis­ skref hafa verið stigin sem ættu að leiða til auk­ins jafn­rétt­is kynj­anna á síð­ustu árum. Víð­tæk and­staða hefur þó ver­ið ­gegn því að ganga lengra í að breyta kerfi og ásýnd flokks­ins í þá veru að konur fáist til þátt­töku.“

Einn af þeim sem hafa gagnrýnt að Bjarni sé í forsvari fyrir Ísland í samhengi jafnréttisátaksins er Sóley Tómasdóttir, fyrrverandi borgarfulltrúi Vinstri grænna. „Ok. Bjarni mun þá kannski segja frá því að ef ekki væri fyrir Sjálfstæðisflokkinn, þá væru konur í meirihluta á Alþingi í fyrsta skipti. Að Sjálfstæðisflokkurinn, einn flokka, hafi ekki gripið til neinna aðgerða til að leiðrétta stöðu kvenna.“