„Við getum ekki lengur vonast til þess að finna Birnu á lífi. Sá tímapunktur er kominn og það er vendipunktur í þessu máli öllu saman,“ sagði Grímur Grímsson yfirlögregluþjónn á blaðamannafundi lögreglunnar rétt í þessu.
Látin manneskja fannst við leit þyrlu Landhelgisgæslunnar við Selvogsvita í dag. Lögreglan telur að um sé að ræða Birnu Brjánsdóttur. Ekki er ljóst hvort henni hafi verið komið fyrir í fjörunni, eða hvort hana hefur rekið þangað.
„Við teljum að það séu yfirgnæfandi líkur á því að henni hafi verið ráðinn bani,“ segir Grímur. Enn liggur ekki fyrir hvernig það bar að.
Þetta kom fram í máli lögreglunnar á blaðamannafundi rétt í þessu. 
Þeir sem lögreglan grunar neita sök
Birna hvarf í miðborg Reykjavíkur aðfararnótt laugardagsins 14. janúar. Talið er að Birna hafi farið upp í rauða Kia Rio bílaleigubifreið sem ekið var af skipverja af Polar Nanoq á eða við Laugaveginn.
Tveir menn eru í gæsluvarðhaldi vegna málsins. Þeir eru sjómenn af skipinu Polar Nanoq frá Grænlandi, sem landaði í Hafnarfjarðarhöfn. Tæknideild lögreglunnar fann blóð í bílaleigubifreið sem skipverji hafði tekið á leigu. Skipverjarnir neita sök. Annar þeirra er með sakarferil á Grænlandi. Hann hefur verið dæmdur fyrir fíkniefnabrot. Auk þess hefur hann fengið á sig nauðgunarkæru, en ekki var farið lengra með það mál. Lögreglan gat ekki svarað því hvort grunur léki á um kynferðisbrot í málinu. Engar upplýsingar liggja fyrir í málinu sem benda til þess að mennirnir hafi átt í samskiptum við Birnu áður.
Lögreglan leitar nú að vopni, en ekki er vitað hvort eða hvernig vopni hafi verið beitt. Mennirnir tveir sem sitja í gæsluvarðhaldi vita ekki af líkfundinum, en þeir vita að blóð hafi fundist í bílaleigubílnum sem þeir óku um á, sama bíl og sást á eftirlitsmyndavélum lögreglu í miðbænum. Þeir hafa fram til þessa neitað sök.
Enn er leitað að ökumanni hvítrar bifreiðar sem var ekið vestur Óseyrarbraut í Hafnarfirði laugardaginn 14. janúar kl. 12.24.
Fréttatilkynning frá lögreglunni
Um klukkan eitt í dag fann áhöfn TF-LIF, þyrlu Landhelgisgæslunnar, lík í fjörunni rétt vestur af Selvogsvita, sem er um 15 kílómetra vestur af Þorlákshöfn. Þyrlan lenti skammt frá vettvanginum og var lögreglu strax gert viðvart. Hún kom á staðinn skömmu síðar. Talið er að líkið sé af Birnu Brjánsdóttur, sem saknað hefur verið frá því á laugardag fyrir rúmri viku.
TF-LIF fór í loftið frá Reykjavíkurflugvelli klukkan 10.40. Áformað var að fljúga meðfram strandlengjunni frá Hafnarfirði, vestur fyrir Garðskaga og Reykjanes og allt austur að Þjórsárósum. Þyrlan lenti á Reykjavíkurflugvelli klukkan 16.10.
Landhelgisgæslan vottar ástvinum Birnu Brjánsdóttur innilega samúð.
Þyrla Landhelgisgæslunnar hefur undanfarna daga tekið þátt í leitinni að Birnu Brjánsdóttur. TF-LIF flutti sérsveitarmenn um borð í danska herskipið Tríton og grænlenska togarann Polar Nanoq í nýliðinni viku. Þá leituðu kafarar Landhelgisgæslunnar í Hafnarfjarðarhöfn að vísbendingum sem varpað gætu ljósi á hvarf Birnu. Bátarnir Baldur og Óðinn voru notaðir við leitina.
Birna kvödd
Birna Brjánsdóttir var fædd 1996. Hún starfaði í Hagkaupi í Kringlunni. Vikuna áður en hún hvarf hafði hún farið í kvikmyndahús með föður sínum. Hann kvaddi hana með orðunum „bless elskan mín“ morguninn áður en hún hvarf. Hún var félagslynd, átti fáa nána vini og marga kunningja. Þegar hún skilaði sér ekki heim til föður síns eftir að hafa farið út að skemmta sér laugardaginn 14. janúar var strax farið að leita hennar. Hún hafði ekki verið í neinni óreglu og það var ekki henni líkt að láta ekki vita af sér.
Hvarf Birnu Brjánsdóttur
Fegurðin í sorginni
Móðir Birnu minnist hennar í ljóði: „Núna eru stjörnurnar um þig“
Thomas Møller Olsen dæmdur í 19 ára fangelsi fyrir morðið á Birnu Brjánsdóttur
Móðir Birnu gagnrýnir efnistök fjölmiðla
Birna kvödd í hinsta sinn
Athugasemdir