Arnþrúður Karlsdóttir, eigandi Útvarp Sögu, birtir mynd af sjálfri sér í búrkulíki við hljóðnemann á Facebook-síðu útvarpsstöðvarinnar í morgun og spurði: „Munu útvarpsmenn framtíðarinnar líta svona út?“ Í stuttu samtali við Stundina játaði Arnþrúður að myndin væri af henni sjálfri. 

Athugasemdir við myndina voru jafn margar og þær voru misjafnar. Fleiri voru þó á þeirri skoðun að grínið væri fordómafullt. „Tótal snilld,“ skrifaði þó Guðmundur Franklín Jónsson, fyrrum formaður Hægri grænna.

„Mér finnst þátturinn sem er í dag á mjög lágu plani, þ.e. þessar umræður um múslima, og bera vott af fordómum. Þið eruð búin að gera ykkur upp einhverjar forsendur og ákveða það að moskan verði slæm fyrir íslenskt samfélag. Ég er ekki sannfærð um að allir sem hringja inn til ykkar hafi nokkuð kynnt sér Kóraninn eða íslam. Meira hef ég ekkert um þetta að segja. Góðar stundir,“ skrifaði annar aðili.

„Þið sýnið mikinn þroska,“ skrifar Arnar Sigurðsson. Ingimar Björn Eydal Davíðsson skrifar athugasemd þar sem hann sakar útvarpsstöðina um hatursáróður.

Freistandi að útvarpa með lambhúshettu

„Ég var með myndatöku fyrir fyrirtæki sem sérhæfir sig í íslenskum háfjallaklæðnaði, meðal annars svona lambhúshettur og það hittist svona á að þessi umræða um þessa peningagjöf var á sama tíma. Það er alvarlegur undirtónn í þessu, þó það hafi verið óskaplega freistandi að fara með eina lambhúshettu í útsendingu. Umræðan er þessi að fólk er kannski ekki opið fyrir því að þegar það er verið kaupa sér aðstæður í öðru landi, eins og er verið að gera hérna,“ svarar Arnþrúður spur um hvernig það kom til að hún klæddi sig í „búrku“.

Efast um skýringu múslima

Hún segir að með peningagjöf sinni séu Sádi-Arabar að kaupa ítök á Íslandi. „Þeir eru að kaupa sér aðstöðu, þú áttar þig á því að ef þú styrkir einhvern þá ertu með greiðan aðgang. Meðan ekkert annað er sagt þá getum við ekkert litið öðru vísi á það. Til að kóróna það nú alveg þá segja þessir forsvarsmenn, minnsta kosti Félags múslima, að þeir hafi ekki vitað um þessa peningagjöf. Eigum við bara að trúa því?,“ spyr Arnþrúður. Hún spyr enn fremur hvernig Félag íslenskra múslima hafði ætlast til að borga fyrir byggingu moskunnar. „Mér finnst að Salmann og félagar eigi að gera grein fyrir því.“

Vill sitja við sama borð og múslimar

Arnþrúður hafnar því að í myndinni felist hatursáróður gagnvart múslimum líkt og sumir þeirra sem gerðu athugasemd við myndina héldu fram. „Fólk getur náttúrulega haft sína skoðun á því, en múslimar hafa skoðun á mér og ég má líka hafa skoðun á þeim. Það er enginn sem segir að múslimar séu með hatursáróður gagnvart mér, en ef að ég hef skoðun á þeim þá heitir það hatursáróður. Ég ætla bara að fá að sitja við sama borð,“ segir Arnþrúður.