Bandarískir stjórnmálafræðingar og sagnfræðingar gera reglulegar kannanir í sínum hópi um hverjir séu bestu og verstu forsetarnir þar í landi. Og nú hefur verið birt fyrsta könnunin sem gerð hefur verið eftir að Donald Trump tók við embætti.
Ekki mun mörgum öðrum en hörðustu stuðningsmönnum hans koma á óvart að hann situr tryggilega í neðsta sætinu og þykir því verstur allra hinna 44ra forseta.
Trump ruddi James Buchanan úr neðsta sætinu en Buchanan er alræmdur fyrir að hafa látið reka á reiðanum í forsetatíð sinni 1857-1861 þegar leið að borgarastríðinu þar vestra.
Athygli vekur að Barack Obama tekur stórt stökk upp á við frá síðustu könnun af þessu tagi en hún var gerð 2014. Þá varð Obama í 18. sæti en fer nú í 8. sætið og er kominn í hóp allra bestu forsetanna að mati fræðimannanna, sem tilheyra samtökunum APSA.
Hér eru tíu bestu forsetarnir að mati fræðimannanna núna:
1. Abraham Lincoln 1861-1865
2. George Washington 1789-1797
3. Franklin D. Roosevelt 1933-1945
4. Theodore Roosevelt 1901-1909
5. Thomas Jefferson 1801-1809
6. Harry S. Truman 1945-1953
7. Dwight D. Eisenhower 1953-1961
8. Barack Obama 2009-2017
9. Ronald Reagan 1981-1989
10. Lyndon B. Johnson 1963-1968
Svo er Woodrow Wilson í 11. sæti, Bill Clinton í 13. sæti, John F. Kennedy í 15. sæti, Bush eldri í 17. sæti, Jimmy Carter er í 26. sæti og Bush yngri í 30. sæti og Richard Nixon í 33. sæti.
Tíu neðstu eru svo þessir hér:
35. Zachary Taylor 1849-1850, dó eftir aðeins ár á valdastóli án þess að hafa afrekað neitt.
36. Herbert Hoover 1929-1933, brást illa við kreppunni miklu og dýpkaði hana í raun verulega.
37. John Tyler 1841-1845, gerði ekkert í aðdraganda borgarastríðs.
38. Millard Fillmore 1850-1853, gerði ekkert í aðdraganda borgarastríðs.
39. Warren Harding 1821-1823, skammlífur en ótal hneykslismál komu upp í ríkisstjórn hans.
40. Andrew Johnson 1865-1869, klúðraði uppgjöri eftir borgarastríðið.
41. Franklin Pierce 1853-1857, gerði ekkert í aðdraganda borgarastríðs.
42. William Henry Harrison 1841, dó eftir aðeins mánuð í starfi.
43. James Buchanan 1857-1861, gerði ekkert í aðdraganda borgarastríðs.
44. Donald J. Trump 2017 og enn í dag.
Fræðimennirnir gefa forsetunum einkunnir fyrir hitt og þetta áður en heildareinkunn þeirra er reiknuð út og Trump mun hafa lent í neðsta sæti á nálega öllum einkunnaskölunum, nema þeim sem átti að mæla „umdeildasta forsetann“.
Þar vann Trump, en sá „sigur“ þykir raunar ekki jákvæður.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
























































Athugasemdir