Við Íslendingar setjum gjarnan takmarkið hátt en ætlum okkur stundum um of, eins og dæmin sanna. En að einu leyti höfum við vakið verðskuldaða athygli án þess að mikið sé um það rætt hér heima. Tilurð nýju stjórnarskrárinnar sem varð til í opnu og lýðræðislegu ferli á árunum 2010 til 2012 hefur orðið til þess að margir fræðimenn við viðurkennda háskóla hafa fjallað um málið og borið lof á þann samtakamátt sem skilaði okkur nýjum samfélagssáttmála sem lagður var í dóm þjóðarinnar fyrir sléttum fjórum árum síðan. Sumir af þessum ágætu fræðimönnum hafa einnig ritað greinar til birtingar í íslenskum fjölmiðlum þar sem þeir hrósa okkur fyrir að fara nýjar leiðir í lýðræðismálum en snupra jafnframt stjórnmálaflokka fyrir að sýna þessu ekki áhuga eða tilhlýðilega virðingu. Lítum á nokkur dæmi:
Lawrence Lessig, prófessor við lagadeild Harvard-háskóla:
„Aldrei hafði neitt þessu líkt gerst í sögu stjórnarskrárréttar. Ef lýðræði er vald þjóðar, og ef fullveldi lýðræðisþjóðar byggist á vilja þjóðarinnar, þá er þessi aðferð og þessi stjórnarskrá eins gild og ósvikin og stjórnarskrár annarra ríkja heimsins. Þó hefur Alþingi hafnað því að þessi stjórnarskrá skuli öðlast gildi. Þá kviknar spurning sem hver og einn sem berst fyrir lýðræði um heimsbyggð alla hlýtur að spyrja sig: með hvaða rétti?“
Lena Ramstetter og Zoe Lofkofridi við háskólann í Salzburg:
„Íslenska aðferðin við beint lýðræði og aðild að ákvörðunum byggðist á allt öðrum skilningi á beinu lýðræði. Andstætt þjóðaratkvæðagreiðslum skipar hún ekki kjósendum í andstæðar fylkingar. Þess í stað byggðist íslenska aðferðin á umræðum, þar sem leitað var málamiðlana, og þær búnar til. Þetta er aðferð sem sundrar ekki, heldur sameinar.“
Marc Fleurbaey, prófessor við Princeton-háskóla:
„Stjórnarskárdrögin sem samin voru 2012 eru annað merkilegt og byltingarkennt afrek. Í því ferli var grasrótin lögð til grundvallar og kallaðir voru saman fjölmargir borgarar sem skilgreindu grunngildi þjóðarinnar. Síðan var kjörin fámennari nefnd sem hélt áfram að vinna við verkefnið með fáséðu gagnsæi. Árangurinn er einstök blanda alþýðlegrar visku og sérfræðiþekkingar. Kannski er það þess vegna sem umrædd stjórnarskrá komst ekki í gegnum þingið. Hvað er í húfi? Ef til vill er það sjálft lýðræðið í innsta eðli sínu.“
Antoni Abat y Ninet, prófessor við lagadeild Kaupmannahafnarháskóla:
„Engum dettur í hug að þetta byltingarkennda ferli, sem Íslendingar áttu frumkvæðið að, verði auðvelt viðfangs, og framundan eru ýmsir farartálmar, en þegar upp er staðið er það vilji fólksins sem skiptir sköpum í lýðræðisríki. Sé það vilji Íslendinga að leggja til grundvallar stjórnarskrárdrögin sem þjóðin samdi getur enginn mannlegur máttur komið í veg fyrir að svo verði. Fyrr eða síðar verður sá texti samþykktur.“
D.A. Carrillo, S.M. Duvernay og B.V. Stracener, við lagadeild Berkeley-háskóla:
„Það er grundvallaratariði í fulltrúalýðveldi að þjóðin feli stjórninni völd og að þeim sé beitt í þágu þjóðarinnar. Í þessu viðhorfi felst að þjóðin eigi rétt á að breyta eða bæta stjórnina þegar stjórnin hættir að þjóna tilgangi sínum. Það er kjarninn í fullveldi þjóðar. Þjóðin skóp stjórnina, stjórnin starfar í þágu þjóðar, og þjóðin hefur vald til að endurskapa hana.“
Arne Hintz frá Cardiff-háskóla:
„Frá sjónarhóli Evrópubúa er Ísland tákn lýðræðis og framfara, nú þegar heimsálfan er nánast öll þjökuð af efnahagslegri óvissu, einræðistilburðum og ótta. Ný stjórnarskrá Íslands, stjórnarskrá þjóðarinnar, vísar heimsbyggðinni leið út úr kreppunni og til nýrrar uppbyggingar. Brýnt er að hún verði samþykkt – ekki bara vegna Íslendinga, heldur líka fyrir Evrópubúa og aðra.“
Hví skyldu þessir ágætu fræðimenn annars vera að skrifa greinar í íslensk blöð og fjölmiðla? Hafa þeir ekkert betra við tímann að gera? Gæti hugsast að þeir telji þetta skipta máli í stóra samhenginu, það er þróun lýðræðis?
Þann 20. október voru 4 ár liðin síðan Íslendingar greiddu atkvæði um þær tillögur sem vitnað er til hér að ofan. Niðurstöður þeirrar atkvæðagreiðslu voru afgerandi og óvéfengjanlegar. Tveir þriðju hluti kjósenda vildu “að tillögur stjórnlagaráðs verði lagðar til grundvallar frumvarpi að nýrri stjórnarskrá”. Af þessu tilefni efndi Háskólinn í Reykjavík til ráðstefnu í samstarfi við Stjórnarskrárfélagið. Gestir ráðstefnunnar voru meðal annars nokkrir af þeim erlendu fræðimönnum sem hér hefur verið vitnað til.
Það líður senn að alþingiskosningum. Á vefsíðunni http://canyouhearus.is má sjá hvaða framboð hafa skuldbundið sig til þess að gera stjórnarskrárumbætur, sem grundvallast á drögum stjórlagaráðs, að forgangsmáli á næsta kjörtímabili. Nýir tímar kalla á nýjar reglur og nýjan samfélagssáttmála. Það er ein forsenda þess að endurheimta traust almennings á stjórnmálaflokkum.
Svörum kalli tímans.
Frá stjórn Stjórnarskrárfélagsins:
Katrín Oddsdóttir,
Sigurður H. Sigurðsson,
Kristín Erna Arnardóttir,
Hjörtur Hjartarson,
Sigríður Ólafsdóttir,
Ingólfur Harri Hermannsson,
Þórir Baldursson.
Athugasemdir