Árið 2004 var áhugavert ár í sögu íslenskrar stjórnskipunar. Það var árið sem málskotsréttur forsetans var virkjaður í fyrsta sinn. Fram að því höfðu margir litið svo á að 26. grein stjórnarskrárinnar væri dauð og ómerk þar sem henni hafði aldrei verið beitt og að forsetinn væri í raun valdalaus. Annað kom á daginn og hefur forsetinn nú þrívegis synjað lögum frá Alþingi staðfestingar. Málskotsrétturinn er því óumdeilanlega virkur og telja margir hann raunar ómissandi við að brúa bil á milli þings og þjóðar.
En hvað þá með aðrar rykfallnar greinar stjórnarskrárinnar? Það stenst greinilega enga skoðun að greinar verði óvirkar af notkunarleysi.
25. greinin
Ein mikilvæg grein stjórnarskrárinnar hefur staðið ónotuð og óbreytt síðan 1944. Hún er stutt og hljómar svona: „Forseti lýðveldisins getur látið leggja fyrir Alþingi frumvörp til laga og annarra samþykkta.“
Orðalagið er skýrt og fer varla á milli mála að forsetinn gæti að eigin frumkvæði látið leggja fram á Alþingi frumvarp til laga,
enda fer hann sjálfur með löggjafarvaldið ásamt Alþingi eins og segir í 2. gr. Að vísu segir í 38. gr. að einungis alþingismenn og ráðherrar hafi rétt til að flytja frumvörp til laga og gætu því orðið einhver áhöld um framkvæmdina.
Rétt er þó að hafa í huga að forsetinn hefur sterkara umboð en nokkur annar einstaklingur þar sem hann er þjóðkjörinn milliliðalaust í einföldu persónukjöri. Í krafti þess gæti forsetinn því beitt þingið hæfilegum þrýstingi ef illa gengi að semja um meðferð málsins.
Forsetinn á leik
En hvaða aðstæður gætu leitt til þess að forsetinn myndi ákveða að virkja frumkvæðisrétt sinn? Það væri þá helst ef Alþingi væri vanhæft til að fylgja eftir málum sem varða það sjálft, svo sem lög um stjórnskipun, kosningar til Alþingis, ráðherraábyrgð, réttindi og skyldur alþingismanna, fjármál stjórnmálaflokka og viðbrögð við pólitískri spillingu. Einmitt í þeim tilfellum þar sem hagsmunir almennings og hagsmunir stjórnmálaflokka færu ekki endilega saman. Forsetinn gengdi þar lykilhlutverki sem þjóðkjörinn fulltrúi almennings. Slíkum málum gæti í sumum tilvikum einnig þurft að vísa til þjóðarinnar.
Reyndar hefur berlega sýnt sig í endurskoðunarferli stjórnarskrárinnar hvernig þingið virðist með öllu ófært um að framfylgja vilja kjósenda eins og hann birtist í afgerandi niðurstöðum þjóðaratkvæðagreiðslunnar 20. október 2012. Þar eru alþingismenn úti að aka og þann hnút þarf forsetinn að höggva á.
Stóra kosningamálið
Væntanlegir frambjóðendur í forsetakjöri vorið 2016 þurfa að geta svarað skýrt til um hvort þau styðji fram komið frumvarp að nýrri stjórnarskrá. Kjósendur veittu tillögum stjórnlagaráðs brautargengi í lögmætri þjóðaratkvæðagreiðslu þar sem tveir þriðju hlutar þeirra sem afstöðu tóku studdu tillögurnar. Það er því ljóst að breiður stuðningur er fyrir hendi.
Einnig þyrftu frambjóðendurnir að geta svarað því með hvaða hætti þau hygðust fylgja málinu eftir. Væru þau tilbúin að virkja 25. greinina, og láta sjálf leggja fyrir Alþingi það frumvarp til stjórnskipunarlaga sem þingmenn komu sér undan að greiða atkvæði um á síðasta kjörtímabili?
Höfundur er ritari Stjórnarskrárfélagsins.
Athugasemdir