Kvikmyndir eru hluti af lífi okkar flestra. Við notum frítíma okkar til að setjast niður og gleyma stund og stað yfir góðri mynd. Eigum uppáhalds myndir, leikara og leikstjóra og horfum á uppáhalds myndirnar okkar oftar en einu sinni. En hvað ef það kemur í ljós að efnið sem við horfum á er nánast alltaf leikstýrt, skrifað og leikið af körlum?
STIFF, Stockholms feministiska filmfestival, og Kvenréttindafélag Íslands hafa framkvæmt úttekt á kynjahlutfalli í kvikmyndum. Þar kemur fram að konur leikstýrðu aðeins 7% af kvikmyndum sem sýndar voru í kvikmyndahúsum á Íslandi og í ríkissjónvarpinu.
Kynjabilið er ekki aðeins stórt á bak við myndavélina, heldur einnig á hvíta tjaldinu. Karlar voru 71% aðalsöguhetja kvikmynda í íslenskum kvikmyndahúsum, og aðeins 4,5% þessara kvikmynda var í senn leikstýrt af konu og með konu í aðalhlutverki. Svo virðist sem reynsluheimur karla hafi greiðastan aðgang að kvikmyndahúsum og sjónvarpsstöðvum.
Niðurstöður okkar eru sláandi. Við lifum í sjónrænni menningu og kvikmyndir eru eitt af mikilvægustu frásagnarformum okkar daga. Kvikmyndir og sjónvarpsþættir hafa áhrif á hvernig við sjáum og skiljum heiminn. Til að ná jafnrétti í samfélaginu er nauðsynlegt að tryggja jafnrétti í kvikmyndaiðnaðinum. Bæði karlar og konur eiga að segja sögurnar á hvíta tjaldinu, og sögur skal segja um okkur öll.
Kvenréttindafélag Íslands hvetur stjórnvöld til að beita eftirfarandi aðferðum til að auka jafnrétti í kvikmyndum:
- Að endurskoða stefnumótun í menningarmálum til að tryggja kynjajafnrétti í framboði á kvikmyndum, sjónvarpsefni og öðru menningarefni.
- Að útbúa leiðarvísi fyrir kvikmyndahús og dreifingaraðila til að hvetja til dreifingu og sýningu kvikmynda kvenna og karla til jafns.
- Að skuldbinda Kvikmyndamiðstöð Íslands til að halda kynjatölur um kvikmyndir sem sýndar eru í íslenskum kvikmyndahúsum, svo sem tölur um leikstjóra, framleiðendur, aðalsöguhetjur og ásókn.
- Að endurskoða lög um fjölmiðla 38/2011 til að skuldbinda sjónvarpsstöðvar að vinna að því að jafna stöðu kvenna og karla í sýningum á kvikmyndum og sjónvarpsþáttum.
- Að skuldbinda RÚV til að halda utan um kynjatölur um afþreyingarefni sem sýnt eru í Ríkissjónvarpinu.
- Að endurskoða samning við RÚV og gera það að markmiði að kvikmyndir og sjónvarpsþættir sem framleidd eru af konum verði 50% þess myndefnis sem sýnt er 2020.
Að sjálfsögðu er aðeins hluti vandans að finna hjá stjórnvöldum og vandinn einnig langt út fyrir Ísland. Eigendur kvikmyndahúsa, dagskrárstjórar sjónvarpsstöðva og dreifingaraðilar hljóta að líta í eigin barm og líta til þeirra breytinga sem þau geta gert til að brúa kynjabilið. Við neytendur kvikmynda eigum að hafa aðgang að fjölbreyttum kvikmyndum, kvikmyndum sem sagðar eru af körlum og konum og um karla og konur... til jafns.
Í gær hófst Stockfish International Film Festival, þar sem almenningi og fagfólki í íslenskum kvikmyndaiðnaði gefst tækifæri til að spjalla saman um íslenskan kvikmyndaiðnað, áskoranir og framtíð hans. Ein stærsta áskorunin framundan er að rétta af gífurlega kynjaslagsíðu í kvikmyndaiðnaðinum, bæði hér á landi og erlendis.
Við vonum að úttekt okkar auki umræðu um stöðu kvenna innan kvikmyndaiðnaðarins. Kvikmyndir eru of mikilvægur hluti af menningu okkar til að við einskorðum okkur við sögur og sjónarmið karla. Í dag kl. 17 bjóðum við til samræðna um kynjabilið í kvikmyndaiðnaðinum, í pallborði í Bíó Paradís. Aðgangur er ókeypis og opinn öllum. Hittumst þar!
Athugasemdir