Um liðna helgi sat ég sem oftar á knæpu og paufaðist við að skrifa ljóð (hafið ekki áhyggjur, ég hef aldrei fengið ritlaun til að drekka út). Á borði næst mínu sat hópur kátra, ungra Bandaríkjamanna. Þau drukku, hlógu og sprelluðu. Virtust skemmta sér hið besta. Ég myndi ekki segja að ég hafi hlerað samræðurnar, en einhver kynni að kalla það svo. Gott og vel, ég hleraði. Þetta voru áhugaverðir einstaklingar með sterkar skoðanir sem þau voru óhrædd við að flíka. Mest var þeim niðri fyrir þegar talið barst að kókaínsölum en það var þó ekki það sem vakti helst athygli mína. Heldur hitt að þeim þótti fremur skíttur sósíalisminn sem þau virtust ásátt um að rekinn sé hér á landi (og enn skíttara reyndar að þessir fjárans sósíalistar skyldu rukka aðgangseyri í almenningssundlaugar – sem er áhugaverður vinkill). Þau fjösuðu eitthvað um afætur og hlógu. Hér vaknaði áhugi minn. Mér finnst þessi sósíalismi okkar nefnilega líka fremur skíttur. Undir honum borgum við fyrir liðsinni sjúkrabíla, fyrir heimsóknir á sjúkrahús og til lækna, svo fátt eitt sé nefnt. Þá lætur hið sósíalíska kerfi flesta sálfræðiaðstoð ósnerta svo hún er rekin ósósíalískt enda sálarmein prívat en ekki sósíal. Geðveiki er líka prívat. Líf eru prívat. Að sjálfsögðu. Ein manneskja, eitt líf. Snaggaralegt. Þess vegna rukkum við sósíalistarnir krabbameinssjúklinga um fúlgur fyrir meðferðir. Til að tryggja fullkomið prívasí lífsins reynum við jafnvel að færa þjónustu sjúkrahúsa, mátulega smávægilega uppskurði og ámóta smotterí, yfir til einkarekinna stofa – en athugið þó þetta: Til að hafa góða yfirsjón reynum við jafnframt að tryggja sem mest og best tengsl stofanna við forsætisráðherra. Þó það nú væri! Eftirlit er svo mikilvægt. Og svo litið sé á hinn enda tilvistarrófsins þá er aldeilis ekki ókeypis að drepast heldur, en blessunarlega getum við kvatt í þeirri vissu að kostnaðurinn fellur á einhvern annan. Samt prívat sko. Þannig er hann, þessi tiltekni sósíalismi okkar. Kostar í sund, kostar í krabbameinsmeðferð. Nei, sem ég segi er ég hreint ekki ósammála ungu Bandaríkjamönnunum á knæpunni, þessi sósíalismi okkar er óttalegt helvítis hrat.