Ljóst er að efnahagsmálin verða í brennidepli hjá nýrri ríkisstjórn. Þar eru vissulega ærin verkefni framundan þrátt fyrir að þjóðmálaumræðan virðist á köflum gefa annað til kynna.
Af nýlegri ákvörðun peningastefnunefndar um að halda vöxtum óbreyttum má ráða að þrátt fyrir spennu í hagkerfinu séu viðsjárverðir tímar á mörkuðum. Útlit er fyrir umtalsverðan hagvöxt á næstu misserum, borinn uppi af innlendri eftirspurn, en þó eru víða blikur á lofti. Ýmis merki eru um að hraður vöxtur eftirspurnar sé farinn að reyna á þanþol innlendra framleiðsluþátta.
Vissulega er rétt, sem komið hefur fram í máli fjármálaráðherra að undanförnu, að heilt á litið séu jákvæð teikn á lofti í efnahagsmálum hérlendis. En þegar glittir í spennumerki á mörkuðum er brýnt að stjórnmálamenn og stefnusmiðir vinni samhendis að því að gæta jafnvægis, jafnt í ríkisfjármálum sem og á sviði peningamála. Hér þarf að gæta varkárni og huga að utanaðkomandi orsakaþáttum sem og þeim sem eðlislægir eru íslensku efnahagsumhverfi, svo sem hvað varðar gengi krónunnar.
Upp á síðkastið hefur mörgum orðið tíðrætt um Salek-fyrirkomulagið svokallaða og er það vel. Til að slík tilhögun virki sem skyldi – og fái yfir höfuð staðist – er þó brýnt að allir aðilar efnahagslífsins stígi varlega til jarðar og vinni saman með faglega nálgun að leiðarljósi. Þá er ljóst að umræðan í þjóðfélaginu þarf einnig að styðja við ábyrga stjórn ríkisfjármála sem og jafnvægi á sviði gengis- og peningamála.
Í því samhengi er hugmynd Viðreisnar um að koma á fót svokölluðu myntráði allrar athygli verð. Rétt væri að skoða kosti og galla slíkrar tilhögunar með opnum hug, án fordóma.
Brýnasta hagsmunamálið er þó auðvitað að ný ríkisstjórn rasi ekki um ráð fram. Við Íslendingar þekkjum enda vel afleiðingar þess þegar þjóðarbúskapurinn fer út af sporinu.
Athugasemdir