Lára G. Sigurðardóttir læknir varar við því að fólk „deyfi sig með CBD“ í grein í Fréttablaðinu í dag. Efnið er ólöglegt á Íslandi, en það er selt erlendis án efnisins THC sem er vímugjafi í kannabisplöntunni. Engar vísbendingar eru um neikvæðar afleiðingar neyslu CBD samkvæmt skýrslu alþjóðastofnunar.

Í greininni segir Lára að eina óumdeilanlega notagildi kannabidíól (CBD), sem unnið er úr kannabisplöntum, sé samkvæmt Alþjóðaheilbrigðismálastofnuninni (WHO) að draga úr áhrifum sjaldgæfrar flogaveiki og þar þurfi læknir að vera með í ráðum. „Það eru reyndar vísbendingar um að CBD geti hjálpað við kvíða, svefnleysi og verkjum en þetta hefur enn ekki verið staðfest á óumdeilanlegan hátt,“ skrifar hún.

Þá segir hún CBD vera umdeilanlegt og að Íslendingar verði að stíga varlega til jarðar. Umræða um lögleiðingu þess hefur farið fram á Alþingi. „Og í stað þess að reyna að normalísera kannabisneyslu á Íslandi væri virðingarverðara ef umræddir þingmenn legðu púður sitt í að auðvelda fólki aðgang að sjúkraþjálfurum, læknum og sálfræðingum til að ráðast að rótum vandans í stað þess að hvetja fólk til að deyfa sig með CBD,“ skrifar hún.

„Til þessa eru engar vísbendingar um notkun CBD sem vímugjafa eða lýðheilsutengd vandamál sem tengjast notkun hreins CBD“

Í skýrslu WHO frá júní í fyrra, sem Lára vísar líklega í, kemur fram að neysla mannfólks á CBD hafi ekki sýnt að hún leiði til misnotkunar eða fíknar. Vísbendingar séu um að það nýtist sem meðferð gegn fjölda heilsufarslegra kvilla. CBD sé almennt án alvarlegra hliðarverkana og notkun þess sé örugg. „Mörg lönd hafa breytt stefnu sinni til að koma CBD að sem heilsuvöru,“ segir í skýrslunni. „Til þessa eru engar vísbendingar um notkun CBD sem vímugjafa eða lýðheilsutengd vandamál sem tengjast notkun hreins CBD.“

Lára segir skynsamlegra að markaðssetja CBD sem lyf, ef það eigi að leyfa það til að meðhöndla sjúkdómskvilla. „Vissulega er kannabisdíól ekki vímugefandi en við megum ekki gleyma því að það er framleitt úr kannabisplöntu sem skaðar heila ungs fólks,“ skrifar hún. „Það er því ekki hægt að líkja því saman við lýsi eða önnur fæðubótarefni sem hafa engin tengsl við svo skaðleg efni. Í Bandaríkjunum er ekkert eftirlit með innihaldi CBD-neysluvara og eru næstum 70% þeirra rangmerkt. Auk þess hefur vímugjafinn THC mælst oftar en ekki í fólki sem taldi sig einungis vera að neyta CBD. Hver ætlar að sjá um eftirlitið á Íslandi – enginn!“