Sex regnbogafánar munu blasa við Mike Pence, varaforseta Bandaríkjanna, við komu hans í Höfða í dag. Samkvæmt dagskránni fær hann leiðsögn um húsið klukkan 15:35.

Pence hefur sætt gagnrýni vegna andstöðu sinnar við réttindi samkynhneigðra. Hefur hann verið andvígur því að samkynhneigðir þjóni í bandaríska hernum og kosið gegn auknum réttindum LGBT+ fólks. Hann er einnig andvígur hjónaböndum tveggja aðila af sama kyni.

Fyrirtækið Advania flaggar fánunum fyrir utan höfuðstöðvar sínar, sem eru beint á móti Höfða. „Við erum bara að fagna fjölbreytileikanum eins og alla daga,“ segir Þóra Tómasdóttir, upplýsingafulltrúi Advania, í samtali við Stundina.

Regnbogafáninn hefur verið tákn í baráttu hinsegin fólks um áratuga skeið. San Francisco-búinn Gilbert Baker hannaði og saumaði fánann árið 1978. Litirnir áttu að tákna samfélag samkynhneigðra, að því fram kemur á vef Hinsegin daga. „Á þrjátíu árum hefur fáninn orðið þekktari sem tákn þeirra en bleiki þríhyrningurinn sem um langt skeið var helsta auðkenni réttindabaráttunnar. Fyrir þetta framtak sitt hefur Gilbert Baker stundum verið kallaður Betsy Ross samkynhneigðra, en hún saumaði fyrsta fána Bandaríkjanna.“

Þá hafa regnbogafánar verið dregnir að húni við skrifstofur Eflingar í Guðrúnartúni. „Við styðjum mannréttindi hinsegin fólks hvar sem er í heiminum,“ segir í færslu á Facebook-síðu Eflingar.