Jón Kári Jónsson, formaður Fé­lags sjálf­stæðismanna í Hlíða- og Holta­hverfi, telur einsýnt að það hefði alvarlegar afleiðingar fyrir Sjálfstæðisflokkinn ef niðurstaða hugsanlegrar atkvæðagreiðslu flokksmanna um þriðja orkupakkann yrði hunsuð. 

„Þingmenn er auðvitað eingöngu bundnir af samvisku sinni sé henni til að dreifa á annað borð,“ segir hann í samtali við Stundina. „Ef söfnunin nær tilskildum undirskriftafjölda, þá þætti mér þó með miklum ólíkindum ef þingflokkurinn myndi hunsa niðurstöðuna algerlega.“

Sam­kvæmt skipu­lags­regl­um Sjálf­stæðis­flokks­ins er miðstjórn flokksins skylt að boða til almennrar atkvæðagreiðslu meðal flokks­manna um til­tek­in mál­efni ef um það berst skrif­leg ósk frá minnst 5 þúsund flokks­bundn­um fé­lög­um, þar af að minnsta kosti 300 flokks­mönnum úr hverju kjör­dæmi lands­ins. 

Mynd: Pressphotos

Bjarni Benediktsson, formaður Sjálfstæðisflokksins, lýsti því yfir í kvöldfréttum RÚV á laugardag að ef fram færi atkvæðagreiðsla um þriðja orkupakkann meðal flokksmanna myndi niðurstaðan ekki hafa áhrif á stefnu þing­flokks­ins. Þingflokkurinn hefði þegar tekið þá afstöðu að innleiða skuli orkupakkann. 

Jón Kári er hissa á þessu viðhorfi. „Ég stend ekki að þessari undirskriftasöfnun til þess að klekkja á forystu flokksins, síður en svo. Mér finnst einfaldlega að stór og opinn flokkur í opnu vestrænu lýðræðisríki hljóti að fagna því ef menn vilja leiða mál til lykta innan flokksins á lýðræðislegan hátt. Er það ekki boðorð dagsins? Menn eru með munninn fullann af lýðræðistali svo út af flóir. Svo þegar á hólminn er komið virðist það engu skipta nema það gagnist manni sjálfum hér og nú. Þetta viðhorf er ekki boðlegt í mínum huga.“

Hann segist þekkja marga sem hafi sagt sig úr Sjálfstæðisflokknum vegna málsins. „Við sjáum að flokkurinn er á niðurleið í skoðanakönnunum. Svo er rétt að hafa í huga að forystan hefur auðvitað nú þegar gengið gegn landsfundarsamþykkt þar sem kom mjög skýrt fram að menn vildu ekki frekara valdframsal í orkumálum. Þá fara menn að snúa út úr og segja að það hafi ekki átt við um orkupakkann. Að sjálfsögðu vísaði þetta til orkupakkans. Þú þarft ekkert stórt pólitískt nef til að sjá það.“

„Maður spyr enn og aftur: af hverju
eigum við að gleypa þennan öngul?“

Jón Kári furðar sig á framgöngu flokksforystunnar. „Maður spyr enn og aftur: af hverju eigum við að gleypa þennan öngul? Af hverju? Bara vegna þess að við erum í EES? Ég held því miður að þetta mál, sem er rekið áfram í óþökk flokks og þjóðar, kunni að grafa undan EES-samningnum, samningi sem hefur gagnast okkur vel og skilað okkur miklu. Maður vill ekki trúa því að þarna búi einhverjar annarlegar hvatir að baki. Maður vill ekki trúa samsæriskenningum, en þær eru auðvitað settar fram í öllum hornum.“

Hann segist sannfærður um að sumir þeirra þingmanna sem hyggist kjósa með innleiðingu þriðja orkupakkans muni gera það með óbragð í munni. „Ég skil ekki hvers vegna er verið að leggja allt þetta vesen á flokkinn og þjóðina. Mér er alveg sama um hagsmuni Sjálfstæðisflokksins í þessu máli, það eru langtímahagsmunir þjóðarinnar sem blífa og ekkert annað, borinna og óborinna. Það er bara ein rétt leið í þessu máli, að senda það aftur til Sameiginlegu EES-nefndarinnar og biðja um varanlega undanþágu. Það er eina lausnin.“