„Þetta varðar önnur lög og reglu­gerðir sem við höfum í gildi þar sem fóstrið er látið ráða.“ Þetta sagði Jón Þór Þor­valds­son, vara­þing­maður Mið­flokks­ins, í umræðum um frum­varp heil­brigð­is­ráð­herra til laga um þung­un­ar­rof í kvöld. 

„Til að mynda með jón­andi geislun um borð í loft­ferðum, þar má venju­legt fólk fá eitt milli-sívert. Geisla­stéttir, til að mynda röntgentæknar, mega taka 3 milli-sívert og flug­stéttir 6, en það er fóstrið sem ræður,“ sagði Jón.

„Annað dæmi, barna­vernd­ar­lög, eða eins og hátt­virtur þing­maður Brynjar Níelsson hefur komið inn á, í refsirétti og sifja­rétt er kveðið á um rétt fóst­urs.“

Samkvæmt erfða­lögum njóta ófædd börn skil­yrts erfða­réttar sem ekki verður virkur fyrr en fóstur fæð­ist sem lif­andi barn. Þá kveður 216. gr. almennra hegn­ing­ar­laga á um bann við því að deyða fóstur. Almennt er þó litið svo á fólk öðlist rétt­hæfi (verði hæft til að eiga rétt­indi og bera skyldur) við fæð­ingu.