Þessi grein birtist upphaflega í Stundinni fyrir meira en 6 árum.

Mið­flokks­menn vitnuðu óspart í lög­fræðinga sem lögðu blessun sína yfir orku­pakka­leið ríkis­stjórnarinnar

Ólaf­ur Ís­leifs­son, þing­mað­ur Mið­flokks­ins, var spurð­ur hvort hann væri ekki læs. „Er bú­ið að af­nema álits­gerð Stef­áns Más Stef­áns­son­ar og Frið­riks Árna Frið­riks­son­ar?“ kall­aði svo Ólaf­ur þeg­ar ut­an­rík­is­ráð­herra vís­aði í álits­gerð lög­fræð­ing­anna.

Mið­flokks­menn vitnuðu óspart í lög­fræðinga sem lögðu blessun sína yfir orku­pakka­leið ríkis­stjórnarinnar

Þingmenn Miðflokksins vitnuðu óspart í álitsgerð tveggja lögfræðinga sem hafa lagt blessun sína yfir þá leið sem ríkisstjórnin leggur til að farin verði við innleiðingu þriðja orkupakkans þegar rætt var um málið á Alþingi í gær.

Ólafur Ísleifsson og Una María Óskarsdóttir, þingmaður og varaþingkona Miðflokksins, byggðu nær allan sinn málflutning á einstökum atriðum sem fram koma í álitsgerð Friðriks Árna Friðrikssonar Hirst og Stefáns Más Stefánssonar um stjórnskipuleg álitamál tengd framsali ríkisvalds til stofnana ESB og EFTA vegna þriðja orkupakkans. Lögðu Miðflokksmenn áherslu á að lögfræðingarnir hefðu lýst alvarlegum efasemdum um að fyrirhugað framsal ríkisvalds rúmaðist innan ákvæða stjórnarskrárinnar.

Það var ekki fyrr en seig á seinni hluta umræðunnar sem þingmennirnir virtust átta sig á því að það er einmitt þessi sama álitsgerð sem liggur til grundvallar þeirri leið sem ríkisstjórnin hefur kosið að fara við innleiðingu þriðja orkupakkans, þ.e. að innleiða hann í íslenskan rétt með lagalegum fyrirvara um að ákvæði um grunnvirki yfir landamæri, t.d. 8. gr. reglugerðar nr. 713/2009, öðlist ekki gildi, enda sé slíkum grunnvirkjum ekki fyrir að fara á Íslandi.

Fjallað er með ítarlegum hætti um umræddan fyrirvara og ástæðurnar að baki honum í greinargerð sem fylgir þingsályktunartillögunni sem Guðlaugur Þór Þórðarson utanríkisráðherra mælti fyrir á Alþingi í gær.

Málflutningur Miðflokksmanna vakti nokkra furðu og hneykslun í þingsal. Þannig var hlegið og kallað fram í fyrir Ólafi Ísleifssyni: „Ertu læs?“ 

„Er búið að afnema álitsgerð Stefáns Más Stefánssonar og Friðriks Árna Friðrikssonar?“

Þegar utanríkisráðherra benti á að ríkisstjórnin hefði ákveðið að fylgja ráðleggingum þeirra tveggja lögfræðinga sem hefðu haft lýst mestum áhyggjum af þeim þætti þriðja orkupakkans er lýtur að framsalsheimildum til alþjóðlegra stofnana kallaði Ólafur: „Er hún í gögnum málsins? Er búið að afnema álitsgerð Stefáns Más Stefánssonar og Friðriks Árna Friðrikssonar?“ 

Una María, flokkssystir Ólafs, steig skömmu síðar í ræðustól og gagnrýndi þingheim fyrir að hafa sýnt Ólafi Ísleifssyni óvirðingu þegar hann lýsti skoðunum sínum.

Byggði ræða Unu Maríu einnig nær alfarið á tilvitnunum í álitsgerð Stefáns Más og Friðriks Árna án þess að vikið væri að þeirri lausn sem þeir leggja til í niðurstöðukafla álitsgerðar sinnar og ríkisstjórnin ákvað að byggja á við innleiðingu þriðja orkupakkans.

„Meðalaðilar sem eru að efast um þetta eru menn eins og Frosti Sigurjónsson, Guðni Ágústsson, Haraldur Ólafsson, Jón Baldvin Hannibalsson, Hjörleifur Guttormsson“

Þorgrímur Sigmundsson, sem einnig er varaþingmaður Miðflokksins, lagði áherslu á að stjórnarskráin yrði að njóta vafans í málinu. „Ég nefni hér bara, til þess að það komi fram hér, að meðalaðilar sem eru að efast um þetta eru menn eins og Frosti Sigurjónsson, Guðni Ágústsson, Haraldur Ólafsson, Jón Baldvin Hannibalsson, Hjörleifur Guttormsson,“ sagði hann. „Mér þykir bara eðlilegt á meðan að menn sem hafa mikla reynslu af störfum fyrir Alþingi Íslendinga og við lagasetningar og við þingsályktunartillögur, þegar þeir hafa uppi svona miklar efasemdir, þá finnst mér eðlilegt að við hlustum.“ 

Í álitsgerð Stefáns Más og Friðriks Árna eru nefndar tvær mögulegar leiðir í orkupakkamálinu til að tryggja að ekki verði brotið gegn stjórnarskrá.

„Ein möguleg lausn gæti falist í því að Ísland fari fram á undanþágur frá reglugerðum nr. 713/2009 og 714/2009 í heild, m.a. á þeirri forsendu að hér á landi fari ekki fram raforkuviðskipti milli landa, og eigi fyrrgreindar reglugerðir því ekki við um aðstæður hér á landi. Kosturinn við þessa aðferð er að hún er tiltölulega einföld í framkvæmd og mætti segja að EES/EFTA-ríkin töluðu einum rómi efslíkar undanþágur fyrir Ísland yrðu samþykktar,“ segja höfundarnir.

Hinni leiðinni, sem ríkisstjórnin hefur kosið að fara, er lýst með eftirfarandi hætti: „Þriðji orkupakkinn verði innleiddur í íslenskan rétt en með lagalegum fyrirvara um að ákvæði hans um grunnvirki yfir landamæri, t.d. 8. gr. reglugerðar nr. 713/2009, öðlist ekki gildi, enda er slíkum grunnvirkjum ekki fyrir að fara hér á landi. Grunnforsenda þessarar lausnar væri þá sú að þriðji orkupakkinn leggi ekki skyldur á Ísland til að koma á fót grunnvirkjum yfir landamæri, heldur sé ákvörðun um það alfarið á forræði Íslands. Ef Ísland tæki ákvörðun um að leggja grunnvirki yfir landamæri, yrðu ákvæði þriðja orkupakkans um grunnvirki yfir landamæri tekin að nýju til skoðunar og þá m.a. með tilliti til þess hvort þau samrýmist stjórnarskránni.“ Taka höfundar fram að þessi lausn sé ekki gallalaus.

„Þetta er önnur þeirra leiða sem lögð var til í áliti okkar Friðriks og að okkar mati er upptaka og innleiðing gerðarinnar með þessum hætti heimil samkvæmt stjórnarskrá enda er lagalegur fyrirvari um að þessi tilteknu ákvæði komi ekki til framkvæmda fyrr en lagagrundvöllurinn, þar með talið stjórnskipunarvandinn, hefur verið tekinn til endurskoðunar á Alþingi,“ segir Stefán Már í tilkynningu sem birtist á vef Stjórnarráðsins þann 22. mars eftir að ríkisstjórnin samþykkti að leggja þingsályktunartillöguna um þriðja orkupakkann fyrir Alþingi.

Greininni hefur verið breytt og tilvitnunum bætt inn í hana frá því hún birtist fyrst.

Kjósa
1
Hvernig finnst þér þessi grein? Skráðu þig inn til að kjósa.

Athugasemdir

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir.
Tengdar greinar

Orkumál

Mest lesið

Mest lesið

Mest lesið í vikunni

„Á ekki möguleika á að fá réttláta málsmeðferð“
2
Fréttir

„Á ekki mögu­leika á að fá rétt­láta máls­með­ferð“

Nauðg­un­ar­kær­an var felld nið­ur, en um­boðs­mað­ur Al­þing­is tek­ur und­ir að­finnsl­ur við rann­sókn lög­reglu, varð­andi at­riði sem hefðu getað skipt máli við sönn­un­ar­mat. Eft­ir at­hug­un á máli Guðnýj­ar S. Bjarna­dótt­ur sendi um­boðs­mað­ur Al­þing­is einnig rík­is­sak­sókn­ara ábend­ingu varð­andi varð­veislu gagna í saka­mál­um og árétt­aði mik­il­vægi þess að ákær­andi hafi öll gögn und­ir hönd­um þeg­ar hann tek­ur af­stöðu.
Komst loks í átröskunarmeðferð þegar veikindin voru orðin alvarleg
5
Viðtal

Komst loks í átrösk­un­ar­með­ferð þeg­ar veik­ind­in voru orð­in al­var­leg

El­ín Ósk Arn­ars­dótt­ir ákvað 17 ára að fara í „sak­laust átak“ til að létt­ast en missti al­gjör­lega tök­in og veikt­ist al­var­lega af átrösk­un. Hún lýs­ir bar­áttu sinni, ekki ein­ung­is við lífs­hættu­leg­an sjúk­dóm held­ur líka brot­ið heil­brigðis­kerfi þar sem fólk fær ekki hjálp fyrr en sjúk­dóm­ur­inn er orð­inn al­var­leg­ur, en dán­ar­tíðni vegna hans er sú hæsta á með­al geð­sjúk­dóma.

Mest lesið í mánuðinum

Forsprakki útifundar játaði fjárdrátt á leikskólanum Klettaborg
1
Fréttir

Forsprakki úti­fund­ar ját­aði fjár­drátt á leik­skól­an­um Kletta­borg

Sig­fús Að­al­steins­son, stofn­andi hóps­ins Ís­land - þvert á flokka, sem stend­ur fyr­ir úti­fund­um um hæl­is­leit­end­ur, ját­aði á sig fjár­drátt frá leik­skól­an­um Kletta­borg þeg­ar hann var for­stöðu­mað­ur þar. Hann vill ekki dæma hvort brot af því tagi séu nógu al­var­leg til að inn­flytj­end­ur sem gerð­ust sek­ir um þau ætti að senda úr landi.
Einhverfir á vinnumarkaði: Starfsmannaskemmtanir bara ólaunuð yfirvinna
5
Úttekt

Ein­hverf­ir á vinnu­mark­aði: Starfs­manna­skemmt­an­ir bara ólaun­uð yf­ir­vinna

Í at­vinnu­aug­lýs­ing­um er gjarn­an kraf­ist mik­illa sam­skipta­hæfi­leika, jafn­vel í störf­um þar sem þess ekki er þörf. Þetta get­ur úti­lok­að fólk, til að mynda ein­hverfa, sem búa yf­ir öðr­um mik­il­væg­um styrk­leik­um. Bjarney L. Bjarna­dótt­ir gerði tíma­mót­a­rann­sókn á þessu og legg­ur áherslu á að at­vinnu­rek­end­ur efli fötl­un­ar­sjálfs­traust.
Drengir kvörtuðu undan kennara og var meinað að sitja kennslustundir
6
Úttekt

Dreng­ir kvört­uðu und­an kenn­ara og var mein­að að sitja kennslu­stund­ir

Tólf ára gaml­ir dreng­ir leit­uðu til skóla­stjóra vegna meints of­beld­is af hálfu kenn­ara. Í kjöl­far­ið var þeim mein­að að sitja kennslu­stund­ir hjá kenn­ar­an­um. Ann­ar baðst af­sök­un­ar eft­ir tvær vik­ur og fékk þá að koma aft­ur í tíma. Hinn sætti út­skúf­un í tvo mán­uði, áð­ur en skól­an­um var gert að taka dreng­inn aft­ur inn í tíma. For­eldr­ar drengs­ins segja kerf­ið hafa brugð­ist barn­inu og leit­uðu að lok­um til lög­reglu.

Mest lesið í mánuðinum

Nýtt efni

Mest lesið undanfarið ár