Brynjar Níelsson um mál Jóns Baldvins: „Ég get alveg stofnað síðu“

Brynjar Níelsson, þing­maður Sjálf­stæð­is­flokks­ins, segir kon­urnar 23 sem birt hafa sögur sínar af meintri kyn­ferð­is­legri áreitni Jóns Baldvins Hanni­bals­sonar á vef­síðu ráð­ast á hann og reyna að meiða hann. Segir hann að allir geti lent í slíkri opin­berri smánun.

Brynjar var gestur í Bítinu á Bylgj­unni í morgun ásamt Helgu Völu Helga­dóttur, þing­manni Sam­fylk­ing­ar­innar. Var umræðu­efnið opin­ber smánun, í sam­hengi við mál Jóns Baldvins og Klaust­urs­þing­mann­anna.

„Ég get alveg sagt sögur af ósæmi­legri hegðun fólks sem ég hef orðið vitni að eða beinst hefur gegn mér og búið til síðu um það,“ sagði Brynjar. „Það bara hvarflar ekki að mér því ég hef engan áhuga á að meiða fólk með þessum hætti.“

Sagði Brynjar þetta vera hegðun sem ætti ekki heima í íslensku sam­fé­lagi. „Það er svo mik­il­vægt að menn bara líti í eigin barm og velti fyrir sér „ég get líka lent í þessu“,“ sagði hann.

Brynjar sagði að kon­urnar hefðu beðið í ára­tugi og ætlað svo að ráð­ast gegn manni sem eigi engan séns á að verja sig. „Fólk er nátt­úru­lega að taka rétt­lætið í eigin hendur. Og þá á að ráð­ast á og meiða ein­hvern mann af því að hann var ósæmi­legur við mig ein­hvern tím­ann,“ sagði Brynjar.

Aldrei verið vonlaust að sækja réttar síns

Brynjar sagði að kon­urnar væru engu bætt­ari með því að greina frá þessu opin­ber­lega. Aðspurður hvort hann teldi rétt­ar­ríkið hafi verið í stakk búið til að taka á svona málum þegar þau komu upp, sum fyrir yfir 50 árum, sagði Brynjar að það hafi aldrei verið von­laust að sækja réttar síns innan kerf­is­ins. „Þeir sem ein­hverja þekk­ingu hafa á þessu vita að það hefur aldrei verið von­laust,“ sagði hann. „Ef þú telur á þér brotið, þá ferðu til við­kom­andi yfir­valda.“

Helga Vala sagði kon­urnar vera að skila skömminni. „Það er allt í lagi að segja frá því sem gerð­ist. Er það bannað? Það er ekki bannað. Þú mátt segja frá því sem gerð­ist. Þetta er lífið þitt. Af hverju máttu bara segja frá góðum hlutum?“

Brynjar svar­aði því þannig að fólk mætti greina frá því sem hefur hent það. „Fólk segir frá því enda­laust. Þú ert að gera það til að refsa við­kom­andi. Þú getur sagt þínum sál­fræð­ingi, þínum vinum, þínum félögum frá. En það er allt annað en að stofna síðu á net­inu til að safna saman til að refsa ein­hverjum manni sem þér fannst sýna ósæmi­lega hegðun eða hafa brotið gegn þér,“ sagði hann.

„Ég get alveg stofnað síðu sko,“ sagði Brynjar að lokum. „Ég er ekki bættur með því að þeim sem voru með ósæmi­lega hegðun gegn mér líði verr.“