Ásmundur Friðriksson, þingmaður Sjálfstæðisflokks, hefur sent forsætisnefnd Alþingis erindi vegna ummæla tveggja þingmanna Pírata um endurgreiðslu aksturskostnaðs hans. Segir hann ummælin „bæði grófar aðdróttanir og fullyrðingar um refsiverða háttsemi mína“. Morgunblaðið greinir frá.

Ásmundur vill að nefndin skoði hvort Björn Leví Gunnarsson og Þórhildur Sunna Ævarsdóttir hafi gerst brotleg við siðareglur fyrir alþingismenn vegna opinberra ummæla sinna um endurgreiðslur þingsins á aksturskostnaði hans. Ásmundur fékk tæpar 23,5 milljónir króna greiddar frá ríkinu vegna aksturs frá árinu 2013.

„Þekkt er í pólitískri baráttu að þingmenn láti miður falleg orð um andstæðinginn falla í umræðu og jafnvel mjög niðrandi,“ skrifar Ásmundur í bréfinu. „Hér er hins vegar um miklu alvarlegri hluti að ræða þar sem ég er sakaður um hegningarlagabrot. Gengið er svo langt í sumum ummælum að fullyrt er að ég hafi framið slík brot. Tel ég að með þessum ummælum sé vegið alvarlega að æru minni.“

Í frétt Morgunblaðsins kemur fram að Ásmundi hafi þótt það miður að bréf sitt hafi lekið úr forsætisnefnd. Vonaðist hann til þess að það hefði ekki áhrif á málsmeðferðina. „Það er mjög alvarlegt að forsætisnefnd þingsins sé ekki treyst fyrir erindum sem á hennar borð koma því í fyllingu tímans verða þau öll opinber. Ég er mjög sorgmæddur yfir því,“ segir Ásmundur.