Aðilar vinnumarkaðarins funda alla daga frá morgni til kvölds en litlar líkur virðast vera á því að gerð kjarasamninga klárist fyrir áramót. Samningar á hinum almenna vinnumarkaði renna út í lok árs. Morgunblaðið greinir frá.

„Við erum búin að vera að funda nokkuð stíft síðustu vikurnar og munum funda næstu tvær vikur fram að jólum en mér finnst ólíklegt að við náum fundi milli jóla og nýárs,“ segir Kristján Þórður Snæbjarnarson, formaður Rafiðnaðarsambandsins. „Við munum nota tímann ef við erum að tala um eitthvað sem skiptir máli en mér sýnist augljóst að við séum varla að fara að ná samningum fyrir áramót miðað við hvernig staðan er.“

Ragnar Þór Ingólfsson, formaður VR, tekur í sama streng og segir ólíklegt að það takist að ljúka samningum á þeim níu virku dögum sem eru til áramóta. „Auðvitað eru menn að reyna að vera lausnamiðaðir en þetta er bara í vinnslu og erfitt að tjá sig um stöðuna að öðru leyti en því að það er ekkert farið að sjá til lands í neinum af þess um stóru málum en þau eru þó öll í vinnslu,“ segir hann.

Halldór Benjamín Þorbergsson, framkvæmdastjóri SA, segist ekki telja ólíklegt að stjórnvöld stígi inn til að greiða fyrir gerð samninga á lokametrum viðræðna. Nú standi yfir að meta vinnustundir og yfirvinnutíma fyrir hvert og eitt stéttarfélag og meta kostnað og áhrif af einstaka breytingum.

„Ég hef ekki farið í grafgötur með það að stóra tækifærið í þessum kjarasamningum er að draga úr þeim mikla yfirvinnukúltúr sem er á Íslandi og það skapar þá grunn fyrir hækkun dagvinnulauna,“ segir Halldór. „Þar erum við stödd í vinnunni eins og sakir standa.“