„Skynsömu fólki má vera ljóst að kröfur háværustu verkalýðsfélaganna eru ekki bara óraunhæfar og óskynsamlegar, heldur með öllu ábyrgðarlausar og aðeins til þess fallnar að búa til falsvonir.“ Þetta segir Áslaug Arna Sigurbjörnsdóttir, þingmaður og ritari Sjálfstæðisflokksins, í aðsendri grein í Morgunblaðinu í dag.
Í greininni segir Áslaug að hugmyndafræði sósíalisma sem heyrst hafi í aðdraganda kjarasamninga byggist á og sæki næringu í sundrungu. „Henni er ætlað að reka fleyg, ekki aðeins milli atvinnurekenda og launafólks heldur einnig milli stétta. Sagan kennir okkur hvaða afleiðingar það hefur.“
„Árið er 2018 en vofa Karls Marx lifnar við í frösum íslenskra forystumanna verkalýðsfélaga og fylgisveina þeirra.“
Segir hún nauðsynlegt fyrir launafólk, ekki síður en eigendur fyrirtækja, að spyrna við fótunum. „Árið er 2018 en vofa Karls Marx lifnar við í frösum íslenskra forystumanna verkalýðsfélaga og fylgisveina þeirra,“ skrifar Áslaug. „Þeir sem eldri eru þekkja afleiðingar sósíalismans í Sovétríkjunum, Austur-Þýskalandi og Kína og við sem yngri erum höfum séð hvernig almenningur í Venesúela hefur greitt dýru verði fyrir enn eina tilraunina í nafni sósíalismans. Landi sem fyrir örfáum árum var eitt auðugasta ríki í Suður-Ameríku en er nú orðið efnahagsleg auðn. Dæmin eru fleiri en rúmast í stuttum pistli sem þessum, en niðurstaðan er alltaf sú sama. Hvar sem sósíalismi hefur skotið rótum eru afleiðingarnar skelfilegar fyrir almenning. Það er engin ástæða til að ætla að niðurstaðan yrði önnur hér á landi.“
Loks skrifar Áslaug að einn af þeim frösum sem hafi heyrst á undanförnum misserum sé að atvinnurekendur séu óvinir launamanna. Ekkert geti verið fjær sanni og hvorugur geti lifað án hinna. „Það er ekki fyrir hvern sem er að gagnrýna eða efast um hagfræðiþekkingu þeirra sem nú fara fyrir stærstu verkalýðsfélögum landsins. Sá hinn sami má eiga von á því að vera samtvinnaður við illt auðvald, sakaður um að vinna gegn launafólki og fleira í þeim dúr,“ skrifar Áslaug.
Athugasemdir