Meirihlutinn í borginni héldi velli ef gengið yrði til kosninga nú. Samfylkingin mundi missa töluvert fylgi og Sjálfstæðisflokkurinn yrði langstærsti flokkurinn í borginni. Þetta kemur fram í könnun sem Zenter gerði fyrir Fréttablaðið.

Sjálfstæðisflokkurinn fengi tæplega 30% atkvæða samkvæmt könnuninni, sem framkvæmd var 12.-15. október. Samfylkingin mundi tapa tveimur mönnum í borgarstjórn, en meirihlutinn héldi velli þar sem Vinstri græn og Píratar bættu við sig einum manni hvor.

Þá var spurt um afstöðu fólks til „braggamálsins“ svokallaða, framúrkeyrslu á kostnaði við endurbætur viðbyggingar braggans í Nauthólsvík. Þriðjungur svarenda taldi ábyrgðina liggja hjá Degi B. Eggertssyni borgarstjóra. Rúmlega fjórðungur sagði að ábyrgði lægi hjá meirihlutanum og álíka margir töldu að embættismenn ættu að axla ábyrgð.

Könnunin var síma- og netkönnun með tvískiptu úrtaki 18 ára eldri úr könnunarhópi Zenter og tilviljunarúrtaki úr þjóðskrá. Svarendur eru íbúar í Reykjavík og voru gögnin vigtuð eftir kyni og aldri. Úrtakið var 1.450 og var svarhlutfallið 54 prósent.