Illugi Gunnarsson, fyrrverandi menntamálaráðherra og þingmaður Sjálfstæðisflokksins til margra ára, var tilnefndur af Bjarna Benediktssyni, fjármála- og efnahagsráðherra, í stjórn Orkubús Vestfjarða ohf. í maí. Sem formaður stjórnarinnar fær hann 252 þúsund krónur á mánuði í laun. Einn stjórnarfundur er í hverjum mánuði og greiðir félagið fyrir flug Illuga frá Reykjavík til Ísafjarðar á fundina auk uppihalds.
Þetta kemur fram í svari Orkubús Vestfjarða ohf. við fyrirspurn Stundarinnar um málið. Illugi var kjörinn í stjórn á aðalfundi félagsins 15. maí. Tók hann við af Viðari Helgasyni, sérfræðingi hjá fjármála- og efnahagsráðuneytinu, sem gegnt hafði starfi formanns stjórnar frá 2011. Laun formanns voru hækkuð úr 240 þúsund krónum á sama aðalfundi og þegar Illugi var skipaður í stjórn.
Hefur Illugi fengið að minnsta kosti 24 milljónir króna fyrir þrjár stöður á vegum hins opinbera sem samflokksmenn hans hafa skipað hann í, auk biðlauna, frá því hann hætti á Alþingi og sem ráðherra í janúar 2017. Tekjur hans af þessum þremur verkefnum og biðlaununum hafa þannig numið rúmri 1,1 milljón króna að meðaltali á mánuði.
Illugi Gunnarsson tilkynnti um brotthvarf sitt úr stjórnmálum um ári eftir að Orku Energy-málið svokallaða kom upp þar sem hann var staðinn að því að hafa selt Hauki Harðarsyni, stjórnarformanni Orku Energy og fyrrum vinnuveitanda sínum, íbúð sína vegna fjárhagsörðugleika og fengið að leigja hana af honum. Hagsmunatengslin lágu í þagnargildi þegar Illugi undirritaði samstarfssamning við kínverska ríkið í maí 2015 og tryggði Orku Energy stöðu „framkvæmdaraðila“ fyrir hönd íslenska ríkisins, en venjulega fá aðeins ríkisfyrirtæki eða ríkisstofnanir slíka stöðu í samningum milli einstakra ríkja.
Á meðal þeirra sem gagnrýndu Illuga harðlega var Páll Magnússon, núverandi þingmaður Sjálfstæðisflokksins og formaður allsherjar- og menntamálanefndar Alþingis. Sagði hann að fyrir lægju „sterkar vísbendingar um brot menntamálaráðherra á hegningarlagaákvæðum um mútuþægni“ og að pólitísk spilling á Íslandi hefði „sjaldan birst jafn hrein og kristaltær“.
Valinn í þrjár stöður til viðbótar við biðlaun
Stundin hefur áður greint frá því að Illugi fékk greiddar 8,3 milljónir króna fyrir setu í nefnd um endurskoðun ramma peningastefnu. Var hann skipaður í nefndina af Bjarna, sem þá var forsætisráðherra. Illugi og Bjarni hafa verið bandamenn í Sjálfstæðisflokknum undanfarna áratugi.
Þá var hann skipaður af flokksbróður sínum Jóni Gunnarssyni, þáverandi samgöngu- og sveitarstjórnarráðherra, sem formaður stjórnar Byggðastofnunar. Hafði hann fengið greiddar tæpar 3,6 milljónir króna frá apríl 2017 til júníloka 2018 fyrir setu í stjórninni.
Loks átti hann rétt á biðlaunum til sex mánaða, bæði sem þingmaður og ráðherra, alls 10.957.638 kr. Fékk hann þau greidd að fullu, þrátt fyrir að hafa gegnt öðrum störfum á sama tímabili, sem að öllu jöfnu hefðu átt að leiða til skerðingar biðlauna, samkvæmt upplýsingum frá fjármálaskrifstofu Alþingis.
Athugasemdir