„Ég fékk sjokk þegar ég frétti fyrst af því að dómurinn væri svona vægur,“ segir Anna Gílaphon Kjartansdóttir um niðurstöðu Héraðsdóms Austurlands sem nýlega dæmdi föður hennar í fjögurra ára fangelsi fyrir kynferðisbrot og brot á nálgunarbanni. Í viðtali við Stundina í janúar lýsti hún misþyrmingunum sem hún mátti þola í æsku, bæði af hendi föður síns og ofbeldisfullrar stjúpu.

„Ég var mjög sár og fannst eins og mér væri ekki trúað,“ segir Anna um niðurstöðu héraðsdóms. „Mér fannst að hann ætti að fá miklu þyngri dóm en hann fékk. Ég vissi að hann mundi neita sök, en hann sverti mig líka til að láta sjálfan sig líta betur út.“

Kjartan Adolfsson var ákærður í sjö liðum og sýknaður af þremur þeirra. Sakarefni voru ítrekuð brot gegn dætrum hans þegar þær voru barnungar auk þess að virða ekki nálgunarbann gagnvart annarri þeirra. 

Kjartan var í dómnum sagður hafa sýnt af sér einbeittan brotavilja og var gert að greiða dætrum sínum miskabætur vegna verulegrar tilfinningaröskunar og andlegra þjáninga, þar með talið áfallastreituröskun. Önnu greiðir hann 1,5 milljónir króna, en þeirri yngri greiðir hann 3 milljónir króna.

Varð sár yfir orðum Kjartans fyrir dómi

Anna er nítján ára í dag, býr með yngri systur sinni og segir sambúðina ganga vel. Hún segir gott að vita til þess að faðir hennar hafi fengið dóm, en hún sé þó ósátt með sjálfa niðurstöðuna og hvað faðir hennar sagði fyrir dómi. Þar kvaðst Kjartan ekki eiga skýringu á ásökunum Önnu og sagði hana „hafa breyst í allri hegðun og staðhæfði að hún hefði m.a. farið að lifa óheilbrigðu líferni eftir að hún hóf nám í framhaldsskóla, þá 15 ára.“ Þessum annarlegu hvötum bak við ásakanirnar neitaði Anna fyrir dómi.

„Hann sagði að ég hefði verið að ljúga upp á sig“

„Ég las yfir dóminn og hann sagði að ég hefði verið að ljúga upp á sig af því að ég var byrjuð að lifa óheilbrigðu lífi, byrja að drekka og reykja,“ segir Anna. „Hann sagði að ég hefði viljað flýja frá honum til að vera dópisti. En að sjá mig í dag, ég er ekki sú sem hann segir. Ég er miklu betri manneskja en ég var. Og ég varð mjög sár þegar ég sá þetta.“

Hlaut áður dóm og konan hans einnig

Áður var Kjartan dæmdur í tíu mánaða fangelsi árið 1991 fyrir ítrekuð kynferðisbrot gegn elstu dóttur sinni, Guðrúnu Kjartansdóttur, sem árangurslaust reyndi að vernda yngri systur sínar fyrir föður sínum. Dætur hans voru allar á aldrinum fimm til sjö ára þegar þær segja föður sinn hafa byrjað að brjóta gegn sér.

Þá var stjúpmóðir Önnu og yngri systur hennar, Tipvipa Arunvongwan, sem fædd er árið 1980, ákærð fyrir að hafa „í refsingarskyni, margendurtekið og á alvarlegan hátt, veist að og ógnað heilsu og velferð“ dóttur sinnar og stjúpdætra, með ofbeldi „sem var til þess fallið að ógna, misþyrma og misbjóða börnunum andlega og líkamlega“.

Dómur féll í héraði í mars 2016 þar sem hún var dæmd í tíu mánaða fangelsi, þar af sjö mánaða skilorðsbundið, fyrir líkamlegar refsingar og misþyrmingar gagnvart börnunum, auk þess sem framkoma hennar þótti vanvirðandi og ógna heilsu þeirra og velferð. Þó var talið að yngsta stelpan, dóttir hennar, hefði fengið betri meðferð en stjúpdæturnar. Sjálf sagðist hún í skýrslutöku hjá lögreglu hafa slegið dóttur sína til málamynda, eða til að gæta jafnræðis gagnvart börnunum og sýna stjúpdætrunum að hún elskaði börnin jafnt. Anna lýsti því í viðtali við Stundina að hún hefði verið neydd, af stjúpmóður sinni, til að borða skemmdan mat.