Atli Már Gylfason, fyrrverandi blaðamaður og útvarpsmaður, sem er til rannsóknar vegna sölu á stolnu nautakjöti úr Leifsstöð, heyrist ræða fíkniefnainnflutning á myndbandi sem tekið var upp af honum á laun, rétt áður en upplýst var að hann hefði verið handtekinn með 168 kíló af stolnu nautakjöti í október í fyrra.

Atli Már var ásamt tveimur mönnum handtekinn í október 2017 „vegna stórfellds þjófnaðar á tollfrjálsum varningi frá flugþjónustufyrirtæki á Keflavíkurflugvelli.“ Í myndbandinu, sem birt var í gær, daginn eftir að hann varðist fyrir dómi í meiðyrðamáli Guðmundar Spartakusar Ómarssonar gegn honum fyrir Héraðsdómi Reykjavíkur, heyrist hann ræða um fíkniefnaheiminn og innflutning á kókaíni til landsins. Aðilinn sem deilir leyniupptökunni af Atla nefnir sig Pablo Escobar og er því samnefndur þekktasta eiturlyfjabarón sögunnar. Á myndbandinu sést Atli afhenda manninum, sem stillti upp myndavélinni, nautakjöt og ræða tilkomu þess og tengsl við fíkniefnainnflutning.

Segist hafa unnið að sjálfstæðri rannsókn á fíkniefnaheiminum

Atli hefur á liðnum árum verið einn mest áberandi blaðamaður landsins. Hann hefur starfað sem útvarpsmaður á FM-957 og K-100, skrifaði fyrir Stundina frá árinu 2016 til febrúar 2017, áður en leið hans lá til DV. 

Atli Már útskýrir orð sín á myndbandinu með þeim hætti að hann hafi verið að leita eftir upplýsingum um fíkniefnaheiminn. Þannig hafi nöfn helstu fíkniefnainnflytjenda landsins komið fram í seinni hluta samtalsins. Í yfirlýsingu sinni til fjölmiðla segist hann hafa verið að vinna sjálfstætt að rannsóknarverkefni sem sneri að því að afhjúpa fíkniefnaheiminn.

Maðurinn að baki upptökunniAtli Már segir birtingu upptökunnar tengjast meiðyrðamálið Guðmundar Spartakusar Ómarssonar gegn honum.

Mynd: Youtube

Sagði manninum að hann fengi nautakjöt fyrir kókaín

Á myndbandinu heyrist Atli lýsa því að hann skipti á kókaíni og nautakjöti, sem hann selji síðan. „Gæinn sem var að fá allt kókið hjá mér... Ég er að selja bilað mikið af kóki núna. Og einn gæi kaupir það. Og hann borgar mér í nautakjöti ... Og ég sel nautakjötið. Svo var verið að bösta þá.“

Þá segir hann frá því að daginn áður hafi viðkomandi samverkamaður komið heim til hans með nautakjöt að verðmæti einnar til tveggja milljóna. Þar sem sá maður hafi verið handtekinn megi Atli búast við því að lögreglan fari í símann hjá honum, hann sé því á varðbergi:  „Þess vegna tæmdi ég allt heima. Þess vegna er ég búinn að vera að keyra fram og til baka út af því að ég er búinn að vera að flytja kjöt í Reykjavík. Ég er búinn að vera að láta veitingastaði niður á Laugavegi fá kjöt.“

Með stolið nautakjöt í frystinum

Þann 12. október voru tveir starfsmenn IGS, flugþjónustufyrirtækis á Keflavíkurflugvelli, handteknir fyrir stórfelldan þjófnað á  kjöti úr frystigeymslu á vellinum. Þriðji maðurinn, Atli Már, var handtekinn í kjölfarið og fundust nokkrar frystikystur í íbúð hans sem innihéldu alls 168 kíló af nautakjöti. Var Atli grunaður um að hafa komið ránsfengnum í verð fyrir mennina, en annar þeirra hafði nýlokið við að stela 30 kössum af kjöti þegar hann var handtekinn. Talið var að 150-200 kílóum af kjöti hafi verið stolið í hvert sinn, í minnst þrjú skipti. 

Atli neitaði sök. Í viðtali við Vísi sagðist hann ekki hafa vitað að kjötið væri stolið: „Mig hafði grunað að kjötið væri mögulega flutt hingað til lands í óleyfi, því ég hef að minnsta kosti ekki séð bandarískt kjöt, hvort sem það er nautakjöt, svínakjöt eða kjúkling í stórmörkuðum hér á landi. Og að sama skapi vissi ég auðvitað að ég var ekki að borga virðisaukaskatt af sölunni. En það var í raun og veru það eina ólöglega sem ég hélt að væri við þetta allt saman.“

Meiðyrðamál vegna umfjöllunar um fíkniefnamál

Í gær komst Hæstiréttur Íslands að þeirri niðurstöðu að Sigmundur Ernir Rúnarsson, fréttastjóri Hringbrautar, hefði ekki brotið gegn Guðmundi Spartakusi Ómarssyni þegar fluttar voru fréttir af fréttaflutningi í Paragvæ um meint tengsl hans við fíkniefnaheiminn. Guðmundur Spartakus höfðaði þrjú meiðyrðamál eftir að fjallað var um hann í samhengi við hvarf Friðriks Kristjánssonar í Paragvæ. Ríkisútvarpið ákvað að greiða Guðmundi Spartakusi 2,5 milljónir króna vegna máls gegn fréttastofu RÚV, án þess þó að fréttaflutningur væri leiðréttur eða dreginn til baka. Þriðja málið er síðan mál Guðmundar Spartakusar gegn Atla Má Gylfasyni og Stundinni, vegna greinar um Friðrik Kristjánsson sem birt var í desember 2016 og ummæla sem höfð voru eftir Atla í ýmsum fjölmiðlum í kjölfarið. Fram hefur komið í málflutningi Vilhjálms H. Vilhjálmssonar, lögmanns Guðmundar Spartakus, að Guðmundur telji sig vera „ónefnda Íslendinginn“ í umfjöllun um hvarf Friðriks. Myndbandinu af Atla var deilt daginn eftir vitnaleiðslur fyrir Héraðsdómi Reykjavíkur vegna meiðyrðamálisins. 

Yfirlýsing Atla:

„Ekki er allt sem sýnist í þessu myndskeiði sem er meira en hálfs árs gamalt og tengist heimildaöflun minni varðandi fíkniefnaheiminn á Íslandi. Það er búið að eiga við það töluvert og klippa í sundur en stærsta fréttin í þessu, að mínu mati, er sú að þarna sést hversu langt menn eru tilbúnir til þess að ganga til þess að þagga niður og koma í veg fyrir frekari umfjallanir um fíkniefnainnflutning hingað til lands. Það vantar töluvert meira en helminginn í þetta myndskeið en þegar því lýkur þarna á YouTube þá eru allir helstu leikmenn í fíkniefnaheiminum nefndir á nafn og hlutverk þeirra.

Það er búið að reyna að nota þetta myndskeið til þess að fjárkúga mig og kúga mig til þess að falla frá frekari umfjöllunum  um þennan ljóta heim og þá var líka þess krafist að ég myndi draga umfjöllun mína um hvarf Friðriks Kristjánssonar tilbaka. Líkt og áður hefur komið fram þá læt ég ekki hótanir eða faldar myndavélar hafa áhrif á þær fréttir sem ég tel eiga við almenning, fréttir um þá Íslendinga sem hafa með einum eða öðrum hætti komið að stærstum hluta fíkniefnainnflutnings hingað til lands frá Suður-Ameríku undanfarin ár. Fjölmargir þeirra ganga lausir í dag á meðan burðardýrin sitja inni.

Ég hvet þá sem tóku upp þetta myndskeið og dreifðu á YouTube að birta það óklippt og ósnert. Þá mun tilgangur minn og sannleikurinn koma í ljós. Það munu þeir hinsvegar aldrei gera þar sem þeir eru sjálfir nefndir á nafn. Þá er vert að minnast á það að myndskeiðinu er komið í dreifingu daginn eftir aðalmeðferðina í meiðyrðamáli Guðmundar Spartakusar Ómarssonar á hendur mér vegna skrifa um hvarf Frikka. Það er því augljóslega verið að reyna að hafa áhrif á niðurstöðu dómsins sem er refsivert athæfi hér á landi. Sá sem hleður því upp á YouTube kallar sig Pablo Escobar. Af hverju ætli það sé?“

Fyrirvari um tengsl: Atli Már Gylfason var blaðamaður Stundarinnar frá mars 2016 til febrúar 2017. Stundin átti enga aðild að þeirri heimildarvinnu sem vísað er til í yfirlýsingu hans vegna myndbandsins, sem tekið var upp í október 2017.