Guðmundur Ragnarsson, formaður Félags vélstjóra og málmtæknimanna, vill að Lífeyrissjóðurinn Gildi selji öll hlutabréf sín í N1. Guðmundur situr í stjórn sjóðsins og vill með þessu mótmæla launahækkun Eggerts Þórs Kristóferssonar, forstjóra N1. Laun og hlunnindi hans hækkuðu um rúmlega eina milljón á mánuði á síðasta ári.
„Það gengur ekki lengur að gera siða- og starfskjarareglur sem enginn fer eftir,“ segir Guðmundur í pistli á vefsíðu félagsins. „Við eigum ekki að biðja þá sem hlut eiga að máli, um að laga eða bæta. Ákvörðunin er að baki og stjórn N1 verður að axla sína ábyrgð. Nú er kominn tími til að lífeyrissjóðirnir, sem eru meðal helstu eigenda, láti til sín taka.“
„Mat mitt er að lækka eigi verulega laun forstjórans sem og laun stjórnar N1.“
Guðmundur segist setja stórt spurningarmerki við hæfi forstjórans og stjórnar félagsins ef þau séu ekki hæf til að lesa inn í ástandið í samfélaginu. „Hvernig fer þetta fólk að því að leggja mat á markaðinn sem fyrirtækið starfar á, ef þau ná ekki að vera í sambandi við samfélagið sem þau búa í,“ skrifar Guðmundur. „Mat á hæfi hlýtur að eiga virka í báðar áttir. Laun geti þá líka lækkað ef hæfnin er ekki til staðar. Mat mitt er að lækka eigi verulega laun forstjórans sem og laun stjórnar N1.“
Stjórn VR samþykkti tillögu þess efnis að aðrir starfsmenn N1 hljóti sambærilegar launahækkanir og forstjórinn, en Lífeyrissjóður verslunarmanna á 13,3% hlut í N1. Verður tillagan lögð fram á aðalfundi N1. „Aðalfundur N1, haldinn mánudaginn 19. mars að Dalvegi 10-14 Kópavogi, ályktar að öllum starfsmönnum N1 skuli tryggð sama kjarahækkun og forstjóri félagsins fékk á árinu 2017,“ segir í tillögunni. „Laun forstjóra voru á árinu 2017 70,4 m.kr., eða 5,8 m.kr. á mánuði, og hækkuðu þau um 20,6% milli áranna 2016 og 2017.“
Lífeyrissjóður verslunarmanna er stærsti hluthafinn í N1 og Gildi lífeyrissjóður sá næst stærsti. Sex aðrir lífeyrissjóðir eru meðal stærstu hluthafa. Hagnaður N1 voru rúmir tveir milljarðar króna árið 2017, en hann drógst saman um 38% frá 2016, þegar hagnaður nam tæpum 3,4 milljörðum króna.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir