Kjartan Magnússon, borgarfulltrúi til margra ára og frambjóðandi í leiðtogaprófkjöri Sjálfstæðisflokksins í Reykjavík, hvatti til niðurskurðar í borgarkerfinu á frambjóðendafundi Heimdallar sem fram fór í Valhöll miðvikudaginn 25. janúar.

Þegar hann kynnti framboð sitt sagðist hann hafa verið „niðurskurðarkóngurinn“ eftir hrun og náð að skera niður um 2 til 3 milljarða á sviði mennta-, íþrótta- og tómstundamála. Hann sagði niðurskurðinn eflaust hafa bitnað á fundargestum, sem voru á grunnskólaaldri á þeim tíma, en fullyrti um leið að þjónusta borgarinnar hefði ekkert skerst. 

„Ég hef reynslu af því að taka kerfið í gegn frá því í hruninu. Þá var ég formaður menntaráðs sem sá um rekstur grunnskólanna og íþrótta- og tómstundaráðs og var ef svo má segja niðurskurðarkóngurinn. Þetta var eftir hrun og við urðum að skera niður, hvort sem okkur líkaði betur eða verr. Það var mest skorið niður á mínum sviðum og þá innleiddum við ákveðna aðferðafræði sem ég tel að hafi gefist mjög vel,“ sagði Kjartan í ræðu sinni.

„Ég lagði niður eitt safn“

„Við náðum að skera niður um 2 til 3 milljarða í þessu kerfi sem sumir héldu að væri ekki hægt. Þessi niðurskurður hefur örugglega bitnað á flestum hér inni á sínum tíma, enda náði hann til allra skóla og íþróttafélaga í Reykjavík, en þetta tókst vel og ég stend á því fastar en fótum að þjónustan skertist ekki. Semsagt, við veittum ekki verri þjónustu þrátt fyrir að við næðum að skera niður.“

Í pallborðsumræðum sagðist Kjartan hafa verið formaður menningarmálanefndar í eitt ár og tekist að leggja niður safn. „Ég lagði niður eitt safn. Þá var sagt við mig að það yrði allt vitlaust en það kvartaði enginn,“ sagði hann.

„Við þurfum líka að spyrja okkur að því: Ætlum við að halda úti allri þjónustu? Fólk er hætt að leigja sér bækur í jafn miklum mæli og það gerði. Ættum við að skoða það að leggja niður bókasöfnin eða sameina almenningsbókasöfnin í hverju hverfi skólabókasafninu í hverfinu?“