Hagdeild ASÍ segir hækkun frítekjumarks vegna atvinnutekna ellilífeyrisþega eingöngu gagnast þeim ellefu prósentum ellilífeyrisþega sem hafa atvinnutekjur, en mismuna þeim ellilífeyrisþegum sem ekki eru á vinnumarkaði því lífeyrissjóðstekjur þeirra myndu eftir sem áður skerða ellilífeyri. Aðgerðin gagnist því verst stöddu lífeyrisþegunum lítið. 

Þetta er á meðal þess sem kemur fram í ítarlegri umfjöllun Stundarinnar um kosningaloforð stjórnmálaflokka sem birtist í síðasta tölublaði. 

Sjálfstæðisflokkurinn og Vinstri græn vilja að frítekjumark atvinnutekna eldri borgara verði hækkað upp í 100 þúsund krónur á mánuði. Píratar vilja einnig hækka frítekjumarkið, án þess að nefna ákveðna fjárhæð, auk þess að afnema allar skerðingar á tekjur eldri borgara. Samfylkingin vill hækka frítekjumarkið upp í 109 þúsund krónur strax og meira síðar.

„Frítekjumarkið var 109 þúsund fram að síðustu áramótum þegar það var lækkað í 25 þúsund krónur. Nú eru allar tekjur teknar inn, þar á meðal fjármagnstekjur, og það hefur mikil áhrif á afkomu ellilífeyrisþega,” sagði Gísli Jafetsson, framkvæmdastjóri Félags eldri borgara í Reykjavík, nýlega í samtali við Stundina. Fyrir kosningarnar 2013 sendi Bjarni Benediktsson ellilífeyrisþegum bréf fyrir hönd Sjálfstæðisflokksins og lofaði að afnema tekjutengingar ellilífeyris. Annað kom á daginn.

Viðreisn vill „afnema frítekjumarkið með öllu“ eins og Benedikt Jóhannesson, sem nýlega lét af formennsku í flokknum, sagði í útvarpsviðtali á dögunum. Þorsteinn Víglundsson félagsmálaráðherra sagði svo á fundi Landssambands eldri borgara, Félags eldri borgara og Gráa hersins í Háskólabíói að hann vildi hvetja til aukinnar þátttöku eldri borgara í samfélaginu.

Framsóknarflokkurinn vill afnema skerðingar vegna atvinnutekna eldri borgara svo þeir sem vilja og geta unnið fái tækifæri til þess og einnig Björt framtíð og Miðflokkurinn. Flokkur fólksins vill ekki aðeins fella brott skerðingar vegna atvinnutekna heldur einnig afnema skerðingar greiðslna milli almannatrygginga og lífeyrissjóða til einstaklinga.  

Útgjöld vegna ellilífeyris myndu aukast um 43 milljarða

Miðflokkurinn vill afnema allar tekjutengingar í bótakerfi ellilífeyrisþega. Hagdeild ASÍ bendir á að fjöldi landsmanna 67 ára og eldri sé tæplega 41 þúsund manns.„Afnám tekjutenginga almannatrygginga myndi auka útgjöld til ellilífeyris um að minnsta kosti 60 prósent, eða að minnsta kosti 43 milljarða. Þessi breyting mun þó ekki skila bættum kjörum til verst settu ellilífeyrisþeganna og er ófjármögnuð,“ segir í umsögn ASÍ. 

Píratar vilja afnema tekjuskerðingar námslána og ellilífeyris, en hagdeild ASÍ bendir aftur á að afnám tekjuskerðinga í mikilvægum framfærslukerfum eins og námslánum og almannatryggingum séu mjög dýrar aðgerðir sem skili þeim verst stöddu litlu.