Samdráttur varð í landsframleiðslu Íslands sem nemur 1,1% á öðrum ársfjórðungi að raunvirði, samkvæmt fyrsta mati Hagstofunnar. Engu að síður jókst samneysla um 1,2% á sama tímabili.

„Framlag vöruviðskipta vegur þyngst í samdrættinum en aukinn halli á vöruviðskiptum samanborið við fyrra ár veldur því að framlag þeirra til hagvaxtar er neikvætt um 2,9 prósentustig á öðrum ársfjórðungi,“ segir Hagstofan. Þjóðarútgjöld jukust að raunvirði um 1,6% á sama tíma og samdráttur var í landsframleiðslu.

Á móti jókst landsframleiðslan í heild fyrri helming 2026 um 1,3%. Ekki er tekið tillit til mannfjöldaþróunar og þar með landsframleiðslu á mann. Hægt hefur á mannfjölgun á árinu, samhliða auknu atvinnuleysi.

Hagstofan segir að áætlað sé að vöru- og þjónustuviðskipti við útlönd hafi verið neikvæð um 87,8 milljarða króna á öðrum ársfjórðungi. Það sé töluvert meiri halli en á sama ársfjórðungi síðasta árs þegar hallinn nam 66,2 milljörðum króna.

Í tölum Hagstofunnar er einnig horft til árstíðarleiðréttrar landsframleiðslu. Hún dróst saman meira, eða um 3% á öðrum ársfjórðungi miðað við fyrsta ársfjórðung.

Einkaneysla jókst um 0,1% á árstíðaleiðréttum mælikvarða, samneysla jókst um 0,4%, og fjármunamyndun hækkaði um 18,5%. Á sama tímabili minnkaði árstíðaleiðréttur útflutningur um 6,7% en innflutningur jókst um 13,1%.