Rússland og Norður-Kórea halda í dag athöfn til að fagna fyrsta áfanga vegabrúar á milli landanna, en til stendur að opna fyrir umferð yfir brúnna í sumar.

Brúin liggur yfir Tumen-fljótið sem markar landamæri ríkjanna og getur borið allt að 300 ökutæki og 2.850 manns á dag, samkvæmt samgönguráðuneyti Rússlands.

Ríkin sæta bæði þungum alþjóðlegum refsiaðgerðum, en tengsl þeirra hafa styrkst verulega vegna stríðs Rússlands í Úkraínu. Á sviði efnahagsmála, stjórnmála, menningar og hermála hefur samstarf Moskvu og Pyongyang aukist.

Blása lífi í hagkerfið

Í síðustu viku varaði Suður-Kórea við því að stuðningur frá Kína og Rússlandi hjálpi til við að blása lífi í norðurkóreska hagkerfið, sem hefur átt erfitt uppdráttar um árabil vegna víðtækra refsiaðgerða, nær algerrar alþjóðlegrar einangrunar og mikillar fjárfestingar í hernaði.

Norður-Kórea birtir ekki opinber gögn um stærð hagkerfis síns.

Að mati yfirvalda í Seoul nam verg landsframleiðsla Norður-Kóreu um 30 milljörðum bandaríkjadala árið 2024, sem er aðeins brot af hagkerfi Suður-Kóreu, einu þróaðasta hagkerfi heims.

Norður-Kórea hefur lengi glímt við skort. Hungursneyð um miðjan tíunda áratuginn varð hundruðum þúsunda að bana og skýrslur benda til þess að Covid-19 heimsfaraldurinn hafi einnig ýtt mörgum út í mikla hungursneyð.

Tímamót í samskiptum ríkjanna

Rússland og Norður-Kórea undirrituðu varnarsamning árið 2024 sem kveður á um hernaðarstuðning ef annað hvort landið verður fyrir árás. Sama ár sendi Norður-Kórea þúsundir hermanna til Rússlands til að styðja stríðið í Úkraínu. Þeir voru sendir til vesturhluta Kursk-héraðsins til að hjálpa við að verjast margra mánaða gagnsókn úkraínskra hersveita.

Nýlega hafa nokkrir háttsettir rússneskir embættismenn heimsótt Norður-Kóreu, þar á meðal innanríkisráðherrann, sem er nú staddur þar í landi.

Utanríkisráðuneyti Rússlands sagði að opnun brúarinnar „verði sannarlega tímamót í samskiptum Rússlands og Kóreu. Þýðing hennar nær langt út fyrir það að vera verkfræðilegt afrek.“ Hún myndi stuðla að „þróun viðskipta, efnahagslegra tengsla og mannúðarsamskipta“ milli Rússlands og Norður-Kóreu.