Þingmaður Viðreisnar í Suðurkjördæmi, Guðbrandur Einarsson, hefur sagt af sér þingmennsku til þess að tryggja að það nái að „ríkja algjört traust og friður“ eftir að hafa játað tilraun til vændiskaupa 2012 í samtali við fréttavefinn Vísi, sem áformaði umfjöllun um málið. Guðbrandur var yfirheyrður hjá lögreglu, sem hafði setið um fjölbýlishús þar sem vændissala átti sér stað.
Í samtali við Vísi viðurkennir Guðbrandur að hafa þrætt fyrir vændiskaupin. Hann segist núna ekki hafa fullframið vændiskaupin, heldur hafi sér snúist hugur við fjölbýlishúsið.
Lögreglu sagði hann hins vegar að hann hefði ekki komið í húsið í tilgangi vændiskaupa, heldur farið þangað í partý með fólki sem sótti ársþing Alþýðusambands Íslands þá helgi.
Guðbrandur var á þessum tíma formaður Verslunarmannafélags Suðurnesja og bjó í Keflavík. Þeirri stöðu gegndi hann árin 1998–2019, ásamt fjölda annarra trúnaðarstaða tengdum störfum hans fyrir verkalýðshreyfinguna. Meðal annars sat hann í miðstjórn Alþýðusambands Íslands og var í erindagjörðum sem slíkur þegar tilraun hans átti sér stað.
„Þetta voru stór mistök sem ég harma mjög, sérstaklega gagnvart fjölskyldu minni og vinum en ekki síður samstarfsfólki í Viðreisn og á Alþingi. Ég geri mér fulla grein fyrir alvarleika þessa máls og mun þurfa að einbeita mér að fjölskyldu minni næstu daga og tjái mig því ekki frekar um málið,“ segir Guðbrandur í yfirlýsingu til Vísis.
Við afsögn Guðbrandar tekur Sandra Sigurðardóttir úr Hveragerði sæti á Alþingi, en hún var ein af forsprökkum Okkar Hveragerðis sem vann kosningasigur í síðustu sveitarstjórnarkosningum. Sandra er nú framkvæmdastjóri þingflokks og forseti bæjarstjórnar Hveragerðisbæjar.
Athugasemdir