Róbert Marshall hefur tekið við stöðu aðstoðarmanns Heiðu Bjargar Hilmisdóttur borgarstjóra. Róbert er fyrrverandi alþingismaður og hefur að baki fjölbreyttan feril í stjórnmálum, fjölmiðlum og fjallaleiðsögn. Þetta kemur fram í tilkynningu frá Reykjavíkurborg.
Ágúst Ólafur Ágústsson hætti á dögunum sem aðstoðarmaður borgarstjóra, eftir innan við þriggja mánaða starf, og tók við starfi aðstoðarmanns menna- og barnamálaráðherra. Forveri hans, Katrín M. Guðjónsdóttir, hætti eftir rúmlega tveggja mánaða starf fyrir borgarstjóra. Róbert er því þriðji aðstoðarmaður Heiðu Bjargar sem tók við embætti borgarstjóra í lok febrúar.
Róbert var upplýsingafulltrúi rikisstjórnarinnar meginhluta áranna 2020 og 2021 á meðan Covid 19 gekk yfir. Hann starfaði við fjölmiðla um árabil og var aðstoðarmaður samgönguráðherra áður en hann settist á þing árið 2009.
Róbert er fyrrverandi formaður Blaðamannafélags Íslands og fyrrverandi forstöðumaður fréttasviðs 365. Hann stundaði fiskvinnslu, netagerð og sjómennsku í Vestmannaeyjum og er stúdent frá framhaldsskólanum þar.
Á þingi gegndi hann meðal annars þingflokksformennsku, formennsku í allsherjarnefnd, formennsku í Íslandsdeild þings Öryggis- og samvinnustofnunar Evrópu og sat í umhverfis- og samgöngunefnd, Þingvallanefnd og Norðurlandaráði.
Athugasemdir (1)