„Þegar haft var sam­band við mig og óskað eftir kröftum mínum í ráðu­neytið þá hafði ég nýlega ráðið mig í núver­andi starf. Ég fann þá að barna- og mennta­málin á lands­vísu tog­uðu enda hef ég lengi brunnið fyrir þeim málum,“ segir Ágúst Ólafur Ágústs­son sem er hættur sem aðstoð­ar­maður Heiðu Bjargar Hilm­is­dóttur borg­ar­stjóra. Tilkynnt var um ráðn­ingu hans sem aðstoð­ar­manns Heiðu á vef Reykja­vík­ur­borgar þann 10. júní síð­ast­lið­inn.

Ágúst Ólafur tók við starf­inu af Katrínu M. Guð­jóns­dóttur sem baðst lausnar frá starfi eftir að hún hafði sinnt því í rúma tvo mán­uði.

Ágúst Ólafur segir á Facebook-síðu sinni að það sé sam­komu­lag milli borg­ar­stjóra og mennta- og barna­mála­ráð­herra um að hann muni taka við nýju starfi í ráðu­neyt­inu þar sem hann verður aðstoð­ar­maður Guð­mundar Inga Krist­ins­sonar.

„Sem þing­maður lagði ég fram til­lögu um lög­fest­ingu Barna­sátt­mála Sam­ein­uðu þjóð­anna sem var sam­þykkt. Fyrir þá bar­áttu fékk ég sér­staka við­ur­kenn­ingu Barna­heilla á 20 ára afmæl­is­degi Barna­sátt­mál­ans fyrir „sér­stakt fram­lag í þágu barna og mann­rétt­inda þeirra“, sem mér þykir mjög vænt um. En ég flutti jafn­framt fjöl­mörg önnur mál sem snúa að mál­efnum barna og stuðn­ingi við barna­fjöl­skyldur en hef einnig verið við­loð­andi kennslu und­an­farin 14 ár,“ skrifar Ágúst Ólafur þar sem hann þakkar sömu­leiðis fyrir „stuttan en góðan tíma í Ráð­hús­inu“. 

Ágúst hefur störf 1. sept­em­ber og mun starfa ásamt Guð­björgu Ingunni Magn­ús­dóttur, sem einnig er aðstoð­ar­maður mennta- og barna­mála­ráð­herra.

Lögfræðingur, hagfræðingur og stjórnsýslufræðingur

Ágúst Ólafur er fyrr­ver­andi alþing­is­maður og efna­hags­ráð­gjafi for­sæt­is­ráð­herra. Þá sat hann í banka­ráði Seðla­banka Íslands í fjögur ár og gegndi meðal ann­ars for­mennsku í við­skipta­nefnd Alþingis, Evr­ópu­nefnd for­sæt­is­ráð­herra og í fram­kvæmda­sjóði aldr­aða.

Hann vann sem sér­fræð­ingur á aðal­skrif­stofu Sam­ein­uðu þjóð­anna í New York og hefur að und­an­förnu stundað dokt­ors­nám í opin­berri stjórn­sýslu. Samhliða hefur hann kennt við Háskóla Íslands ásamt því að sinna ráð­gjaf­ar­störfum meðal ann­ars fyrir Sjúkra­liða­fé­lag Íslands, Rann­sókn­ar­setur skap­andi greina og Ljósið.

Ágúst er mennt­aður lög­fræð­ingur, hag­fræð­ingur og stjórn­sýslu­fræð­ingur og á sæti í stjórn Dýra­vernd­ar­sam­bands Íslands og Evr­ópu­hreyf­ing­ar­innar.

Ágúst Ólafur fór í leyfi frá þing­­­störfum í des­em­ber 2018 eftir að hafa verið áminntur af trún­­­að­­­ar­­­nefnd Sam­fylk­ing­ar­innar vegna kyn­­­ferð­is­­­legrar áreitni gegn blaða­­­manni Kjarn­ans. Ágúst Ólafur sótti sér svo aðstoðar vegna áfeng­is­vanda og til­kynnti um það opin­ber­lega. Þá var umdeilt þegar hann sneri aftur á Alþingi og var það gagn­rýnt af Samtökum ungra jafn­að­ar­manna. Hann datt út af þingi árið 2021.