„Oscar er með stuðning frá meirihluta þjóðarinnar og fjöldanum öllum af samtökum,“ skrifar Svavar Jóhannsson, fósturfaðir Oscars Andres Florez Bocanegra, 17 ára drengs frá Kólumbíu, sem hefur verið synjað um alþjóðlega vernd á Íslandi. Svavar nefnir Prestafélag Íslands og Félag fósturforeldra sem dæmi um þau samtök sem styðja að Oscar fái að búa á Íslandi. 

„Útlendingastofnun gefur hins vegar ekkert fyrir það og ætlar sér að koma honum úr landi eftir helgi, hvað sem tautar og raular! Þetta er frábæra Ísland í dag!“ skrifar hann á Facebooksíðu sína nú síðdegis.

Svavar hvetur einnig fólk til að skrifa nafn sitt á nýjan undirskriftarlista sem skorað er á ríkisstjórn Íslands og Alþingi að Oscar fái varanlegt leyfi til búsetu á Íslandi og verði ekki vísað úr landi.  Sonja Magnúsdóttir, fósturmóðir Oscars og eiginkona Svavars, er ábyrgðarmaður listans. 

Fjölmenn mótmæli

Fjöldi mót­mæl­enda kom sam­an á Aust­ur­velli á mánudag til þess að mót­mæla úr­skurð­i kærunefndar útlendingamála. Skila­boð­in voru skýr: „Oscar á heima hér!"

Einn þeirra sem mættu á mótmælin sagði þá í samtali við Heimildina: „Mér finnst þetta mjög óréttlátt að það sé verið að senda hann úr landi. Þetta er bara ógeðslegt í raun og veru að horfa upp á þetta og maður fær illt í hjartað að sjá þetta.“

„Mér finnst þetta mjög óréttlátt að það sé verið að senda hann úr landi. Þetta er bara ógeðslegt í raun og veru að horfa upp á þetta og maður fær illt í hjartað að sjá þetta,” sagði annar. 

Lögmaður Oscars, Helga Vala Helgadóttir, var viðstödd mótmælin og á meðal ræðumanna. Spurð út í niðurstöðu úrskurðarins sagði Helga Vala: „Mér finnst þetta bara efnislega rangt. Ég get ekki séð af hverju er ekki hægt að skjóta skjólshúsi yfir hann, það liggur alveg fyrir að hans félagslegu aðstæður í heimalandinu eru gríðarlega flóknar. Það liggur líka fyrir að barnaverndaryfirvöld á Íslandi brutu á réttindum hans á sínum tíma þegar hann var hérna.” En þá vísar Helga Vala til þess þegar Oscar var sendur til Bógóta í október síðastliðin með föður sínum og var í kjölfarið skilinn eftir á flugvellinum þar. 

Endaði á götunni í Bógóta

Útlendingastofnun synjaði Oscari, föður hans og systrum um alþjóðlega vernd og dvalarleyfi af mannúðarástæðum og var þeim jafnframt brottvísað frá landinu 15. október í fyrra. Oscar endaði í kjölfarið á götunni í Bógóta en Svavar, fósturfaðir hans, sótti hann til Kólumbíu um miðjan nóvember. 

Oscar lagði fram endurtekna umsókn um alþjóðlega vernd 10. febrúar síðastliðin eftir að Útlendingastofnun hafði synjað honum, föður hans og systrum í október í fyrra. Nú lagði hann fram umsókn á þeim grundvelli að hann væri fylgdarlaust barn en Útlendingastofnun vísaði umsókninni frá þar sem ástæðan þótti ekki auka líkur á því að fallist yrði á fyrri umsókn hans skv. 1. mgr. 35. gr. laga um útlendinga. 

Í apríl kærði Oscar ákvörðun Útlendingastofnunar til kærunefndar og gerði grein fyrir því að hann hefði búið við líkamlegt og andlegt ofbeldi af hálfu föður síns og ekki notið verndar móður sinnar en hún og faðir hans eru skilin. Oscar hafi þurft að flýja frá föður sínum og fékk skjól hjá Svavari Jóhannssyni og Sonju Magnúsdóttur, sem berjast með honum fyrir því að hann fái að búa á Íslandi.