Heitar umræður um starf Sósíalistaflokksins hafa gert vart við sig á Rauða þræðinum – umræðuvettvangi Sósíalistaflokks Íslands – á ný. Kveikjan er tölvupóstur Sönnu Magdalenu Mörtudóttur, borgarfulltrúa flokksins, sem sendur var á flokksfélaga í vikunni þar sem þeir voru meðal annars hvattir til að mæta á aðalfund síðar í mánuðinum.
„Undanfarna mánuði hafa ýmsar rangfærslur verið settar fram um flokksstarfið. Fjármál flokksins og mánaðarleg framlög mín til Vorstjörnu – styrktarsjóðs, hafa verið gerð tortryggileg að ósekju. Þrátt fyrir að ásakanir standist ekki skoðun, þá hafa þær grafið undan starfinu, sett vinnu stjórna í uppnám og haft neikvæð áhrif á orðspor flokksins,” skrifaði Sanna Magdalena til flokksmanna.
Í póstinum sagði Sanna einnig að hópur fólks vildi einblína á aðhaldsaðgerðir inn á við og auka eftirlit með störfum félaga, sem hún segir ekki leiðina að árangri. Þess í stað vill hún halda áfram vinnu út á við og beina kraftinum gegn óréttlæti.
Segir gagnrýnina ekki snúa að Sönnu
Umtalsverð innanbúðarátök hafa verið í Sósíalistaflokknum undanfarnar vikur, líkt og Heimildin hefur fjallað um. En þar hafa skipulag og stjórn flokksins einkum sætt gagnrýni.
Því hefur verið haldið fram að hreyfinguna skorti lýðræði og í henni viðgangist fjárhagslegt ábyrgðarleysi, meðal annars vegna mikilla styrkja flokksins til Samstöðvarinnar og Vorstjörnunnar. Þá hefur Gunnar Smári Egilsson, formaður framkvæmdastjórnar flokksins, setið undir ásökunum um ofríki og andlegt ofbeldi.
Óskar Steinn Gestsson svaraði pósti Sönnu á Rauða þræðinum og sagði að gagnrýnin sem fram hefði komið hefði hvorki snúist um hana né hennar framlag. „Deilan í flokknum snýst ekki um þig heldur hvernig hann [Sósíalistaflokkurinn] er skipulagður, hvernig það eru ekki til neinir pappírar um mikilvæg atriði í fjármálum flokksins og hvernig fólk sem ræður ekki við skapið í sér hefur hrakið ófáa í burtu.”
Þá sagði hann að gagnrýnendur væru ekki að biðja um aukið eftirlit með störfum félaga, um stofnun svæðisfélaga á landsbyggðinni. Gagnrýnin beindist enn fremur frekar að stjórnunarmenningu og stjórnsýslu í flokknum frekar en Vorstjörnunni.
Segja Sönnu nýta sér aðstöðu sína
Aðrir stigu fram og gagnrýndu Sönnu fyrir að nýta sér aðstöðu sína til að senda póst í nafni flokksins til að miðla persónulegum skoðunum sínum.
„Fullkomlega óeðlilegt og óviðeigandi af þessum pólitíska leiðtoga okkar að misnota aðstöðu sína til að senda póst í nafni flokksins með einhliða persónulegum skoðunum sínum á innri deilum í flokknum, til að dreifa áróðri og rangindum, í aðdraganda aðalfundar,“ skrifar Jón Ferdínand Estherarson.
„Að misnota með þessum hætti hvatningu til fólks að mæta á aðalfund held ég að varla megi finna hliðstæðu, ekki einu sinni í myrkustu afkimum Valhallar,“ skrifar Birna Gunnlaugsdóttir og segir þennan fjölpóst Sósíalistaflokksins til félaga vera með ólíkindum. En hann væri fullur af óheiðarleika, lygum og rangfærslum.
Framlög gerð tortryggileg
Sjálf bendir Sanna á að framlög hennar hafi verið gerð tortryggileg, meðal annars í fjölmiðlum, og vísar þar til ummæla Sigrúnar Unnsteinsdóttur, stjórnarmanns í Vorstjörnunni, í Heimildinni.
„Ég skil heldur ekki tilganginn með því að stofna þetta félag. Eina skýringin sem ég hef fengið frá Gunnari Smára er að einstaklingur megi ekki styrkja stjórnmálaflokk um meira en 550 þúsund krónur á ári,“ sagði Sigrún við Heimildina í vor. En Sanna styrkir Vorstjörnuna um 1,2 milljónir á ári.
„Vorstjarnan var ekki stofnuð utan um fjárframlög mín til hennar, ég gef hluta af launum mínum því ég vil styrkja Vorstjörnuna og því mér finnst launin mín fáránlega há. Ég vil að það sé til öflugur styrktarsjóður sem styrkir hagsmunabaráttu hinna verr settu, þannig að þau geti byggt upp og rekið hagsmunabaráttu sína.
Mér finnst ekki uppbyggilegt að sjá umfjöllun í fjölmiðlum um að heill styrktarsjóður eigi að hafa verið stofnaður til að ég gæti farið á svig við reglur. Að eina markmiðið með stofnun Vorstjörnunnar hljóti að vera að finna leið fyrir mig til að fara á svig við reglur sem gilda í þessu landi. Ég greiði mánaðarframlag mitt til Vorstjörnunnar, ekki til Sósíalistaflokks Íslands,“ skrifar Sanna.
Athugasemdir (1)