Halla Gunnarsdóttir, starfandi formaður VR, hefur gefið kost á sér til þess að halda áfram að leiða félagið. Halla var kjörin í stjórn VR fyrir tveimur árum, hefur gegnt embætti varaformanns og tók við formennskunni eftir að Ragnar Þór Ingólfsson náði kjöri á þing fyrir Flokk fólksins undir lok síðasta árs.
Kosningar til formanns og stjórnar VR munu fara fram í mars og segist Halla, í framboðstilkynningu, vonast eftir því að hljóta brautargengi frá félagsfólki til áframhaldandi setu sem formaður. Hún sé bara rétt að byrja.
„VR félagar vinna bæði fjölbreytt og verðmæt störf og halda uppi litlum sem stórum fyrirtækjum á almennum markaði. Hluti VR-inga starfar eftir töxtum og grunntímakaup hefur ekki hækkað sem skyldi. Meirihluti félagsfólks VR semur sjálft um kjör sín en nýtur stuðnings af almennum kjarasamningum og þeim hækkunum og réttindum sem þar er samið um. Allir VR félagar eiga það sameiginlegt að njóta góðs af því að tilheyra stóru og öflugu félagi sem veitir fyrirtaks þjónustu og berst fyrir þeirra kjörum og hagsmunum. Þá baráttu vil ég gjarnan leiða,“ segir Halla meðal annars í framboðsyfirlýsingu sinni.
Þar segist hún hafa starfað innan verkalýðshreyfingarinnar í fimm ár og búa yfir fjölbreyttri reynslu af vinnumarkaði og félagsstörfum.
„Ég hef starfað sem sérfræðingur, skrifstofukona, framkvæmdastjóri, aðstoðarmaður ráðherra, blaðamaður, verkefnastjóri, lagerstarfsmaður, fótboltaþjálfari, millistjórnandi og afgreiðslukona. Ég hef alla tíð verið virk í félagsstörfum og á mér óteljandi áhugamál. Ég bý í Reykjavík með fjölskyldunni minni en hjarta mitt býr líka að hluta til í London og að hluta á Austfjörðum,“ segir einnig, í tilkynningu Höllu.
Athugasemdir