Sundlaugin í Grindavík var opnuð á nýjan leik þann 11. nóvember síðastliðinn. Opnuninni var vel tekið á meðal Grindvíkinga, jafnt brottfluttra og þeirra sem hafa flutt aftur í bæinn. Töldu margir að um táknræn tímamót væri að ræða, opnun laugarinnar væri liður í að endurreisn væri hafin í Grindavík. Rúmt ár er liðið síðan bærinn var rýmdur því kvikugangur myndaðist undir bænum.

Jóhann Árni Ólafsson (lengst til vinstri)Segir það hafa verið einstaklega ánægjulegt að opna sundlaugina á nýjan leik og sjá bæjarbúa endurnýja tengslin í pottunum.

Mynd: /Aðsent

Jóhann Árni Ólafsson, forstöðumaður íþróttamannvirkja í bænum, segir að það hafi sett strik í reikninginn að Grindavíkurvegurinn rofnaði þegar hraun flæddi yfir hann fyrir þremur vikum síðan.

„Aðsóknin var mjög góð en hefur versnað eftir að Grindavíkurvegurinn fór í sundur. Fram að því var bara nokkuð líflegt hjá okkur, en eftir það þá er þetta mestmegnis fólk sem býr í bænum. Aðsóknin hefur sem sagt minnkað, bæði á meðal brottfluttra Grindvíkinga og annarra ferðamanna,“ segir Jóhann. 

Fjölbreyttur hópur gesta fyrst um sinn 

Flestir gestir voru brottfluttir Grindvíkingar, en ferðamenn slæddust einnig í laugina, bæði innlendir og erlendir. Enn sem komið er er laugin aðeins opin á mánudögum og laugardögum í fjórar klukkustundir í senn.

„Þetta voru aðallega fjölskyldur að koma að heimsækja bæinn aftur. Þá er laugin eitthvað til að sækja í. Eins voru erlendir og íslenskir gestir að gera sér ferð hingað,“ segir Jóhann.

Spurður hvort til standi að lengja opnunartímann segir Jóhann ekki búið að taka ákvörðun um það. Bæjarstjórnin beri ábyrgð á að meta stöðuna og taka ákvarðanir. 

„Það var ákveðið að gera þetta svona fram að áramótum. Staðan verður endurmetin í kjölfarið. Vissulega litar það heildarmyndina að vegurinn til bæjarins hafi lokast. Ég hef samt fulla trú á því að það verði áfram opið í laugina, en það er spurning hversu mikið.“

Ólýsanleg tilfinning að opna aftur

Jóhann segist eiga erfitt með að finna nógu sterk orð til þess að lýsa þeirri tilfinningu að sjá bæjarbúa koma saman aftur í hverfissundlauginni og ræða málin í heita pottinum. Hann segist hafa skynjað mikið þakklæti meðal Grindvíkinga sem hafa snúið aftur í laugina og líkamsrækt sína.

„Ég veit ekki hvort skemmtilegt sé nógu sterkt orð yfir það. Fólk er ótrúlega þakklátt fyrir að komast í laugina og ræktina sína, þó að fólk hafi verið að taka aðeins lengri ferð en það var vant að gera áður,“ segir Jóhann og bætir við að það hafi verið gaman sjá bæjarbúa endurnýja tengslin í heitu pottunum en hann telur fastagesti hafa fyrst fremst saknað fólksins og félagsskaparins sem einkennir íslenska sundlaugarmenningu.

„Ég fann það líka bara á fólkinu sem var að koma, það var rík þörf fyrir að hitta gamla sveitunga sína og taka spjallið í pottinum. Þá verður stundum spjallið öðruvísi en þau sem fara fram í öðrum sundlaugum hjá fólki sem hefur ekki farið í gegnum sömu lífsreynslu.“ 

Sundlauginni hlíft í jarðhræringunum

Sundlaugin og líkamsræktin urðu fyrir litlum skemmdum í jarðhræringunum sem hafa skekið bæinn. Jóhann segir að það hafi aðeins þurft að ráðast í lítils háttar viðgerðir á lauginni þegar bærinn var vatns- og rafmagnslaus um stund á fyrstu mánuðum ársins.

Hann segir þjónustumiðstöð Grindavíkur hafa ráðist í þær jafnóðum og sinnt sínu starfi vel.

„Þeir stóðu vaktina vel og hugsuðu vel um laugina ásamt mörgum öðrum.“

Frá því að laugin var opnuð á nýjan leik hafi verið lítið um uppákomur og flækjustig sem höfðu áhrif á sundlaugargesti. Slæmt aðgengi hafi fyrst og fremst valdið minnkandi aðsókn í laugina.

Það hafa verið nokkur inngrip hjá Almannavörnum með gasmengun og gjall og eitthvað svoleiðis en ekkert alvarlegt. Það hefur aðallega verið lokun Grindavíkurvegarins sem hefur haft áhrif og færðin á bæði Krýsuvíkur- og Nesveginum hefur ekki verið góð. Það er náttúrlega desember og það er dimmur og illa þjónustaður vegur frá helstu íbúakjörnum til Grindavíkur í dag. Þannig það náttúrlega spilar inn í að fólk er ekki alveg að gíra sig upp í 40 mínútna keyrslu á vondum vegum í desember til þess að fara í sund hjá okkur.“

Vegagerð yfir hraunið sem rann yfir Grindavíkurveg er vel á veg komin. Í nýlegri frétt sem birt var á vef Morgunblaðsins er haft eftir Úlfari Lúðvíkssyni, lögreglustjóra á Suðurnesjum, að vonir standi til umað vegurinn verði opnaður fyrir umferð þessa helgi.