„Nú eru enn og aftur tímamót þegar boðað hefur verið til kosninga. Ég hef ákveðið að stíga til hliðar eftir að hafa verið varaþingmaður og þingmaður í 20 ár,“ segir Bjarkey Olsen, þingmaður Vinstri grænna. 

Hún fór fyrst á þing sem varaþingmaður og kom reglulega inn sem slíkur þar til hún var kjörin þingmaður 2013. Bjarkey hefur verið þingflokksformaður, setið í fjölda þingnefnda, verið formaður fjárlaganefndar og velferðarnefndar og nú síðast matvælaráðherra.

Hún greinir frá tíðindunum á Facebooksíðu sinni. Þar segir Bjarkey: „Þetta hefur verið afar skemmtilegur tími og  ég hef  notið þess að hitta fjöldann allan af fólki og mynda góð tengsl víða í kjördæminu í gegnum árin. Það tel ég vera afar mikilvægt enda oft snúið að fylgja eftir mörgum þeim málum sem við landsbyggðarfólk þekkjum svo vel og kallar á sterkar raddir inn á Alþingi. Ég tel að ég hafi sinnt kjördæminu af alúð sem og landinu öllu þessi ár sem ég hef verið á þingi,“ skrifar hún.

Bjarkey segir einnig: „Pólitík er sannarlega snúin og hlutirnir ganga oft hægar en við vildum. Það eru flóknir tímar framundan og það verður vandasamt að vinna úr þeim viðfangsefnum sem ný ríkisstjórn og þing þurfa að takast á við. Ég óska þeim velfarnaðar í störfum sínum.“

Þá segist hún hafa verið í fjarbúð síðastliðin 12 ár og farið heim nær hverja helgi til að njóta samvista við fjölskylduna, og er hún þakklát þeim fyrir þolinmæðina og stuðninginn alla tíð. 

„Ég vil að endingu þakka öllum þann stuðning, vináttu og vinsemd sem ég hef notið þessi tuttugu ár. Áfram VG,“ segir Bjarkey.