„Öll vinna á heimilum og stofnunum Barna- og fjölskyldustofu miðar að því að öryggi barna og starfsfólks sé tryggt. Stofnunin harmar að það hafi ekki tekist í dag og er í djúpri sorg yfir þessu alvarlega atviki,“ segir í tilkynningu frá forstjóra Barna- og fjölskyldustofu, Ólöfu Ástu Farestveit, vegna eldsvoða sem kom upp á neyðarvistum Stuðla í morgun með þeim afleiðngum að 17 ára piltur, sem þar var vistaður, lést og starfsmaður slasaðist. „Ég votta aðstandendum barnsins mína dýpstu samúð,“ segir Ólöf einnig.

Í tilkynningunni kemur fram að aðgerðir frá því í morgun, þegar eldurinn kom upp, hafi miðað að því að tryggja áfram öryggi og velferð allra sem málið snerti. Gerðar hafa verið ráðstafanir fyrir börnin sem voru vistuð á Stuðlum og áfallateymi Rauða krossins kallað til. Lögreglan fer með rannsókn málsins.

„Ljóst er að húsnæði Stuðla er skemmt og ekki unnt að halda þar úti hefðbundinni þjónustu. Búið er að gera samkomulag við SÁÁ um tímabundin afnot af húsnæði á Vogi, þar hefur verið hliðrað til svo hægt sé að bregðast við stöðunni á meðan unnið er að viðgerðum á Stuðlum. Um er að ræða húsnæði sem er unnt að aðskilja frá almennri starfsemi þar sem sérfræðingar Stuðla og Barna- og fjölskyldustofu munu hlúa áfram að börnunum. 

Viðgerðum á Stuðlum verður flýtt eins og unnt er og áhersla lögð á að ljúka uppbyggingu annarra meðferðarúrræða sem unnið hefur verið að. Fyrir hönd Barna- og fjölskyldustofu þakka ég viðbragðsaðilum og barnaverndarþjónustum sveitarfélaga fyrir viðbrögð þeirra í morgun. Ég þakka um leið SÁÁ fyrir skjót viðbrögð og stuðning,“ segir í tilkynningu Ólafar.