„Við erum mætt og við erum í stuði,“ sagði Svandís Svavarsdóttir, innviðaráðherra og nýkjörinn formaður Vinstri grænna, undir lok ávarps síns á landsfundi hreyfingarinnar síðdegis í dag. Ræðuna hélt hún eftir að hún varð sjálfkjörinn formaður flokksins með 169 atkvæðum af 175, sex atkvæði voru auð.

Í ávarpinu þakkaði Svandís fyrrverandi formönnum flokksins – Guðmundi Inga Guðbrandssyni og Katrínu Jakobsdóttur fyrir þeirra framlag til Vinstri grænna.

Þá sagðist hún spennt fyrir framtíðinni. „Ég er einlæglega spennt fyrir þessu verkefni, því mér þykir svo vænt um VG.“

Svandís talaði í ræðunni gegn einstaklingshyggju og kapítalisma, sem hún segir að sjái í öllu gróðavon og sundri frekar en sameini. Þá vildi hún meina að sumir stjórnmálaflokkar nýttu sér þróunina í átt að frekari sundrun markvisst til að ná til sín fólki. „Þess vegna ríður á að við í VG stöndum fyrir mennsku, samstöðu og samheldið samfélag. Að við tölum um gildi. Samveru og tengsl.“

Hefði farið á verri veg án VG

Svandís minntist á að Vinstri græn hefðu síðustu ár setið í ríkisstjórn með borgaralegum öflum, sem hefðu setið í ríkisstjórn hvað lengst í lýðveldissögunni. „Án okkar hefði margt farið á annan og verri veg,“ segir hún.

Starf Vinstri grænna snúist um að veikastar raddir í samfélaginu hafi rödd og geti látið í sér heyra í gegnum hreyfinguna. „Verkefni okkar snýst um að tryggja styrk VG sem félagslegs afls í íslenskum stjórnmálum. Saman getum við lyft grettistaki.“ 

Svandís ræddi meðal annars um mikilvægi náttúruverndar, þess að hugað væri að loftslagsmálum og menntakerfinu. Þá þyrfti að skoða breytingar á fiskstjórnunarkerfinu og sjávarútveginum. Til dæmis væru frumvörp um gagnsæi í sjávarútvegi grundvallarmál. „Þar fáum við að sjá hver, ef einhver, vill standa vörð um leyndarhyggju í sjávarútvegi. Þetta held ég að séu mikilvægustu frumvörp sem tengjast auðlindanýtingu um áratugaskeið.“

Hún kom inn á húsnæðismálin og efnahagsmálin, en ungt fólk á nú mjög erfitt með að eignast eigið húsnæði. Svandís segir það ósanngjarnt að rík þjóð eins og okkar leggi það á ungu kynslóðina. Efla þurfi almenna íbúakerfið og skattleggja aðra og þriðju eign fólks. „Húsnæði á að vera heimili en ekki fjárfesting. Sumu getum við náð fram í samstarfi, annað hlýtur að vera skýrt ákall í kosningabaráttu.“ 

Pláss fyrir sterka vinstri rödd

Nýr formaður Vinstri grænna segir hægri bylgju hafa átt sér stað í íslenskum stjórnmálum. Samfylkingin hafi fært sig lengra til hægri og Miðflokkurinn, þrátt fyrir að kenna sig við miðju, sé lengra til hægri en Sjálfstæðisflokkurinn. Þetta gerði hlutskipti VG og hlutverk ef til vill mikilvægara en áður. Þá væri pláss fyrir sterka vinstri rödd.

Þó væri nú komin upp snúin staða, en samkvæmt nýjustu könnun Gallup kæmist flokkurinn ekki á þing. „VG hefur oft verið spáð illu gengi, af fjölmiðlum, af greinendum, af andstæðingum okkar. En allir þessir sérfræðingar og þessir greinendur hafa haft rangt fyrir sér og tíminn hefur alltaf verið okkar megin, leitt annað í ljós.“

Svandís segir að í þessari stöðu sé þó fullt af möguleikum. „Við finnum að við eigum fullt erindi og erindið er brýnt. Við finnum að á tímum þar sem stjórnmálin eru að breytast, flokkar eru að færa sig til á ásnum frá vinstri til hægri, er pláss fyrir sterka vinstri rödd sem talar máli félagshyggju, mannréttinda, sókn til friðar og náttúruverndar.“