Ekkert fékkst upp í rétt tæplega þrjátíu milljóna króna kröfur sem lýstar voru í þrotabú PPP slf., félags í eigu Jóns Óttars Ólafssonar, fyrrverandi rannsóknarlögreglumanns hjá embætti sérstaks saksóknara og ráðgjafa Samherja. 

Jón Óttar stofnaði PPP árið 2013 undir nafninu Juralis-ráðgjafarstofa eftir að slitnað hafði upp úr samstarfi hans og Guðmundar Hauks Gunnarssonar. Þeir höfðu starfað saman hjá sérstökum saksóknara við rannsókn hrunmála og síðar í félaginu PPP sf. sem sjálfstæðir rannsakendur, eins og Jón Óttar lýsti sjálfur í viðtali við Vísi árið 2014.

Sérstakur saksóknari kærði þá félaga árið 2012 fyrir brot á þagnarskyldu í starfi fyrir að hafa látið skiptastjóra Milestone hafa rannsóknargögn embættisins um félagið. Þrotabú Milestone hafði ráðið PPP til starfa og vann Jón Óttar samhliða fyrir embætti sérstaks saksóknara og skiptastjórann um skeið. Kæran var á endanum látin niður falla og leiddi ekki til ákæru.

Félaginu, sem nú er gjaldþrota, var lýst í stofngögnum sem alhliða ráðgjafarstofu við fyrirtæki, einstaklinga og stofnanir. 

Einn stærsti kúnni Jóns Óttars í gegnum PPP var Samherji. Fram kom fyrir dómi í skaðabótamáli sem sjávarútvegsrisinn höfðaði gegn Seðlabankanum að samtals hafi útgerðin greitt PPP meira en 130 milljónir króna. Vildu lögmenn Samherja meina að þetta væri kostnaður sem til væri kominn vegna rannsóknar gjaldeyriseftirlits Seðlabankans á fyrirtækinu.

Ekki er alveg ljóst hvort allir fjármunirnir hafi farið í gegnum PPP slf., sem nú hefur verið úrskurðað gjaldþrota, eða í gegnum PPP sf., félag þeirra Jóns Óttars og Guðmundar, en bæði félög virðast hafa starfað sem ráðgjafar Samherja.