Forstjóri Rapyd Europe hf., íslensks dótturfélags hins ísraelska Rapyd, segir misskilningur að móðurfélagið fari með ráðandi hlut í íslenska félaginu. Það gerir forstjórinn í aðsendri grein á Vísi, þar sem hann segir misskilnings gæta varðandi skráningu raunverulegra eigenda í íslenskri fyrirtækjaskrá.

Þar er Ariel Shtilman skráður eigandi án þess að eignarhlutar hans sé getið en hann er stjórnarformaður íslenska félagsins. Ariel er alla jafna kallaður Arik, og skrifar sem slíkur undir skjöl er tengjast Rapyd Europe hf. Hann er forstjóri Rapyd á heimsvísu og stofnandi fyrirtækisins.

Styr hefur staðið í kringum fjártæknifyrirtækið Rapyd og starfsemi þess hér á landi eftir að Sthilman lýsti yfir stuðningi fyrirtækisins við stríðsrekstur Ísraela á Gaza.

Tilefni greinaraðar Garðars Stefánssonar, forstjóra Rapyd Europe hf., er kröftug umræða um þessi ummæli Shtilman á samfélagsmiðlum og þrýstingur á að fyrirtæki og neytendur sniðgangi Rapyd og beini viðskiptum sínum til annara færsluhirða. Þessi þrýstingur hefur skilað nokkrum árangri; til að mynda sagði Rauði krossinn á Íslandi upp samningi sínum við Rapyd í síðasta mánuði vegna umræðunnar og stéttarfélagið Efling gerði slíkt hið sama. 

Önnur fyrirtæki hafa þó haldið tryggð við Rapyd. Nú liggur til að mynda nú fyrir að Ríkiskaup hafa endurnýjað þjónustusamning sinn við Rapyd. Í samtali við Heimildina segir Sara Lind Guðbergsdóttir forstjóri Ríkiskaupa að ákveðið hafi verið að nýta heimild til framlengingar. „Tíminn verður nú nýttur á næstu mánuðum til þess að undirbúa nýtt útboð,“ sem mun fara fram í vor.

Þá nefnir Sara að ein af ástæðunum að baki ákvörðuninni hafi verið tæknilegs eðlis. „Það voru tæknilegar ástæður í samstarfi okkar við Fjársýsluna og Advania sem á kerfið,“ segir Sara.

Samningurinn felur í sér að fyrirtækið mun sinna færsluþjónustu fyrir allar A-hluta stofnanir ríkisins. Það eru um 160 stofnanir alls. 

Tekist á um þjóðerni Rapyd á Íslandi

Garðar færir í greinum sínum rök fyrir því að fyrirtækið sé raun ekki ísraelskt, heldur gamalgróið íslenskt fyrirtæki. Hann hafnar gagnrýninni sem fyrirtækið hefur setið undir og segir þær ekki eiga við rök að styðjast.  Bendir hann á að fyrirtækið sé rekið á íslenskri kennitölu sem stofnuð var árið 1983. Þá sé starfsfólk Rapyd, sem er um 180 talsins, allt búsett hér landi.

Sömuleiðis bendir hann á þjónustan sem fyrirtækið býður upp sé afrakstur áratugalangrar þekkingarsköpunar og vöruþróunnar sem hefur átt sér stað hér á landi. Þar á Garðar að öllum líkindum við arfleifð fyrirtækjanna Korta og Valitor sem sameinuðust undir merki alþjóðlega fjártæknifyrirtækisins Rapyd á árunum 2020 til 2022.

Gagnrýnendur Rapyd hafa bent á að samkvæmt fyrirtækjaskrá Skattsins eru skráðir raunverulegir eigendur Rapyd á Íslandi margumræddur Shtilman,

ásamt öðrum ísraelskum ríkisborgara og einum breskum manni. Móðurfélag Rapyd Europe hf. er líka í ársreikningi sagt ísraelska fyrirtækið Rapyd Financial Network (2016) Ltd.

Þessu hefur Garðar svarað í pistli á Vísi og sagt að eignarhald félagsins sé dreift og alþjóðlegt og að móðurfyrirtækið fari ekki með ráðandi hlut í Rapyd á Íslandi. Þá telur hann gagnrýnendur fyrirtækisins oftúlka eigendaskráninguna sökum vanþekkingar. 

Hins vegar er vert að benda á það að þegar Rapyd Financial Network keypti Valitor, sem síðar var endurnefnt Rapyd, árið 2022 þurfti Fjármálaeftirlit Seðlabanka Íslands að samþykkja að félagið væri hæft til fara með yfir 50 prósent eignarhlut Valitor.

Í fréttatilkynningu sem birtist á vef Seðlabankans segir að fjármálaeftirlitið hafi komist að „þeirri niðurstöðu að Ariel Shtilman, framkvæmdastjóri Rapyd væri hæfur til að fara með yfir 50% óbeinan virkan eignarhlut í Valitor hf.“

Auglýsingar kostaðar af móðurfélaginu

Undanfarið hefur Rapyd staðið að auglýsingaherferð sem margir hafa eflaust séð á skiltum við strætóstoppistöðvar og á samfélagsmiðlinum Youtube. Auglýsingarnar bera yfirskriftina „þróað á Íslandi,“ þar sem lögð er rík áhersla á arfleifð fyrirtækjanna sem Rapyd eignaðist milli áranna 2020 og 2022.

Farið er yfir sögu fyrirtækisins sem sögð er teygja sig aftur til ársins 1983. Fyrirtækið byggi því á gömlum íslenskum merg og sé í raun íslenskt í eðli sínu. Glöggir netverjar hafa þó bent á að auglýsingaherferðin sem birt er á Youtube er kostuð af Rapyd Financial Network sem er skráð í Ísrael.