Forstjóri Ríkiskaupa, Sara Lind Guðbergsdóttir, segir að enn eigi eftir að taka ákvörðun um það hvort rammasamningur við greiðslumiðlunarfyrirtækið Rapyd verður framlengdur. 

Í skriflegu svari við fyrirspurn Heimildarinnar segir Sara að „ekki liggur fyrir hvort heimild til framlengingar verði nýtt eða hvort samningurinn verði boðinn út að nýju.“

Rammasamningur um færsluhirðingu fyrir A-hluta stofnanir tók gildi 19. febrúar 2021. Samningurinn gilti í tvö ár og var framlengdur um eitt ár og mun því renna út eftir tæpan mánuð. Samkvæmt samningnum er heimilt að framlengja hann aftur til eins árs. 

Spurð um til hvaða sjónarmiða sé litið til í endurskoðunarferlinu, segir Sara Lind að lagt sé „mat á það hvort forsendur til framlengingar séu fyrir hendi eða hvort markaðsaðstæður hafi breyst með þeim hætti að rétt sé að falla frá þeirri heimild og bjóða samninginn út að nýju. Hluti af því ferli er að leggja mat á það hvort ástæður til útilokunar eigi við, eins og þeim er lýst í lögum um opinber innkaup.“

Hávær krafa um sniðgöngu 

Harðnandi átök fyrir botni Miðjarðahafs og skæðar loftárásir Ísraelshers hafa leitt til þess að margir hafa hér á landi hafa hvatt til þess að sniðganga vörur og þjónustu frá ísraelskum fyrirtækjum.

Í þeirri umræðu hefur ísraelska greiðslumiðlunarfyrirtækið Rapyd gjarnan verið nefnt. Sérstaklega eftir að ummæli forstjóra Rapyd, Arik Shtilman, komust í hámæli hér landi í lok október í fyrra.

Í nokkrum færslum á samfélagsmiðlinum LinkedIn sagði Arik að hann og fyrirtækið styðji árásir Ísrael á Gasa. Í kjölfarið hefur víða verið hvatt til sniðgöngu fyrirtækja sem eru í viðskiptum við Rapyd og þrýstingur settur á þau til að færa viðskipti sín annað. Á meðal þeirra sem hafa nýverið sagt upp samningi við Rapyd vegna umræðunnar hérlendis er Rauði krossinn á Íslandi.

 Fyrirtæki í sterkri stöðu

Í júlí 2021 náði Rapyd samkomulagi við Arion banka um kaup á Valitor fyrir um 100 milljónir Bandaríkjadala. Samkvæmt skýrslu Samkeppniseftirlitsins sem birt var 2022 kaupunum jókst markaðshlutdeild Rapyd talsvert með kaupunum, en fyrir kaupin hafði Valitor verið í markaðsráðandi stöðu. Á sama tíma hafi markaðshlutdeild SaltPay, sem hét áður Borgun, dregist verulega saman.

Sem fyrr er í gildi þjónustusamningur Ríkiskaupa við Rapyd um færsluhirðingu fyrir A-hluta stofnanir. Samningurinn var upphaflega gerður við Valitor hf. eftir að hafa boðið upp á hagstæðasta tilboðið í útboði sem var haldið árið 2021. 

Undir A-hluta stofnanir flokkast um 160 stofnanir ríkisins. Sem dæmi eru heilbrigðisstofnanir, sjúkrahús, framhaldsskólar, háskólar og Áfengisverslun ríkisins A-hluta stofnanir.

Setning forstjóra Ríkiskaupa rennur líka út í febrúar

Samkvæmt heimasíðu Ríkiskaupa kemur fram að tímabundin setning forstjóra Ríkiskaupa rennur út 29. febrúar næstkomandi. Sara tók við starfinu eftir að Björgvin Víkingsson sagði upp starfi sínu og var ráðinn innkaupastjóri Bónus í maí 2023. 

Sara Lind var skipuð af þáverandi fjármálaráðherra, Bjarna Benediktssyni, sem tímabundinn forstjóri Ríkiskaupa til 31. ágúst. Skipunartími hennar var síðar framlengdur til lok febrúar á þessu ári. 

Í svari sínu við fyrirspurn Heimildarinnar um það hvort hún ætli að sækja um starfið þegar það verður auglýst svarar Sara blaðamanni með því benda honum á að beina fyrirspurn sinni til fjármála- og efnahagsráðuneytisins „sem hefur umsjón með málaflokknum og skipar í embættið.“