Sjúkratryggingar Íslands svara ekki hvort opnuð hafi verið eftirlitsmál gegn Klíníkinni

Ríkisstofnunin Sjúkratryggingar Íslands hefur ekki svarað spurningum sem Heimildin sendi henni fyrir tveimur mánuðum síðan. Engin svör hafa borist um af hverju spurningunum hefur ekki verið svarað. Meðal spurninga er hvort Sjúkratryggingar Íslands hafi opnað eftirlitsmál gegn einkarekna heilbrigðisfyrirtækinu Klíníkinni líkt og Heimildir herma.

22. janúar 2024 · 14:00

Ingi Freyr Vilhjálmsson

ritstjorn@heimildin.is

Ríkisstofnunin Sjúkratryggingar Íslands hefur ekki svarað spurningum sem Heimildin sendi henni fyrir tveimur mánuðum síðan. Engin svör hafa borist frá stofnuninni um af hverju hún hefur ekki svarað spurningunum. Sjaldgæft er að ríkisstofnarnir eins og Sjúkratryggingar svari ekki spurningum fjölmiðla eða gefi útskýringar á því af hverju viðkomandi svarar ekki spurningunum.

Spurningar Heimildarinnar snúast meðal annars um það hvort Sjúkratryggingar Íslands hafi í gegnum árin opnað einhver eftirlitsmál gegn einkarekna heilbrigðisfyrirtækinu Klíníkinni, líkt og heimildir herma.

Ein spurningin hljóðar svo: „Hafa einhvern tímann í gegnum árin verið opnuð eftirlitsmál gagnvart Klíníkinni, sem sagt starfsmönnum fyrirtækisins, innan Sjúkratrygginga Íslands? Þá er átt við mál sem tengjast mögulegum og meintum brotum starfsmanna fyrirtækisins á því laga- og regluverki sem gildir um samskipti Sjúkratrygginga Íslands og einkarekinna fyrirtækja sem veita heilbrigðisþjónustu.“

Þessar spurningar til Sjúkratrygginga Íslands hafa verið ítrekaðar margsinnis en engin svör hafa borist.

Hafa svarað öðrum spurningum í millitíðinni

Sjúkratryggingar Íslands, nánar tiltekið forstjórinn Sigurður Helgi Helgason, hafa hins vegar svarað öðrum spurningum um önnur mál sem Heimildin hefur spurt stofnunina að. Þessar spurningar blaðsins hafa snúist um plastbarkamálið svokallaða og mögulega opnun einkarekinnar heilsugæslustöðvar á Akureyri.

Af einhverjum ástæðum hafa Sjúkratryggingar Íslands hins vegar ekki svarað spurningunum frá 17. nóvember, um meðal annars Klíníkina.

Spurningar Heimildarinnar til Sjúkratrygginga Íslands fylgja hér á eftir.

Spurningarnar sem Sjúkratryggingar Íslands svara ekki

Þann 17. nóvember sendi Heimildin 12 spurningar til Sjúkratrygginga Íslands. Stofnunin hefur ekki svarað þeim og hefur heldur ekki útskýrt af hverju hún hefur ekki gert það.

1. Í febrúar síðastliðnum var auglýst eftir tilboðum frá fyrirtækjum á einkamarkaði í liðskiptaaðgerðir. Auglýsingin var birt skömmu eftir að þú tókst við starfi forstjóra Sjúkratrygginga. Samningarnir um aðgerðirnar voru svo undirrtaðir í mars og gilda út árið. Getur þú lýst aðdragandanum að því að ákveðið var að fara í slíkt útboð á liðaskiptaaðgerðum og af hverju þessi ákvörðun var tekin á þessum tímapunkti? Um var að ræða fyrsta skiptið sem gengið hefur verið til samninga við einkaaðila um að gera liðskiptaaðgerðir með kostnaðarþátttöku SÍ.

2. Hversu margar liðskiptaaðgerðir hefur Klíníkin gert á þessu ári með kostnaðarþátttöku Sjúkratrygginga Íslands? Hversu háar eru greiðslurnar frá Sjúktrayggingum til Klíníkurinnar vegna þessara aðgerða?

3. Hafa einhvern tímann í gegnum árin verið opnuð eftirlitsmál gagnvart Klíníkinni, sem sagt starfsmönnum fyrirtækisins, innan Sjúkratrygginga Íslands? Þá er átt við mál sem tengjast mögulegum og meintum brotum starfsmanna fyrirtækisins á því laga- og regluverki sem gildir um samskipti Sjúkratrygginga Íslands og einkarekinna fyrirtækja sem veita heilbrigðisþjónustu.

4. Ef svarið við spurningu 3. er já hvers eðlis hafa þessi mál þá verið? Hverjar hafa lyktir þessara mála verið innan Sjúkratrygginga Íslands? Átt er er við hvort málum hafi verið lokað í kjölfar skoðunar, eða með einhvers konar uppgjöri eða sáttagjörð við Klíníkina, eða þeim vísað til Landlæknis til frekari skoðunar og svo framvegis?

5. Hversu miklir fjármunir hafa runnið frá Sjúktratryggingum Íslands til Klíníkurinnar, fyrirtækja starfsmanna Klíníkurinnar, einkahlutafélaga, eða eftir atvikum dóttur- og hlutdeildarfélaga, eða annarra aðila sem tengjast rekstrinum, á hverju ári frá árinu 2017? Hér er átt við fjármuni sem Sjúkratryggingar Íslands hafa greitt til þessara aðila á grundvelli kostnaðarþátttöku ríkisins í tiltekinni læknis- og heilbrigðisþjónustu sem Klíníkin og starfsmenn hennar veita? Óskað er eftir upplýsingum um þennan kostnað á hverju ári frá 2017.

6. Hver er staðan á útboði liðskiptaaðgerða til einkafyrirtækja í heilbrigðisþjónustu fyrir næsta ár, ef ákveðið hefur verið að slíkt útboð fari fram yfirleitt sem heilbrigðisráðherra hefur reyndar sagt að muni verða? Framkvæmdastjóri Klíníkurinnar hefur sagt að fyrirtækið ætli sér að gera 1000 liðskiptaaðgerðir á næsta ári. Sjá grein í Læknablaðinu hér: https://www.laeknabladid.is/tolublod/2023/11/nr/8459
Hvenær verður útboðið auglýst og hversu margar aðgerðir verða boðnar út?

7.Ef nýr samningur verður um þessar aðgerðir, sem ég reikna með út frá orðum bæði ráðherra og framkvæmdastjóra Klíníkurinnar, hvernig verður hann þá frábrugðinn núverandi samningi?

8. Hvernig hefur það gefist að þínu mati, Sigurður, að einkafyrirtæki eins og Klíníkin geri liðskiptaaðgerðir með kostnaðarþátttöku ríkisins í gegnum SÍ? Hvernig hefur þetta gengið hjá öllum fyrirtækjunum sem SÍ hefur gert við samning Klíníkinni, Cosan og svo Orkuhúsinu, sem vitanlega er kannski fullsnemmt að spyrja um? Hverjir eru kostir og gallar samningssambandsins og þessara fyrirtækja að þínu mati?

9. Hversu margar aðgerðir hefur Cosan slf. gert á árinu og hversu háar eru greiðslurnar til þessa fyrirtækis frá SÍ?

10. Almennt séð, hvert er viðhorf þitt Sigurður til einkarekstrar í heilbrigðiskerfinu?

11. Stendur til, á vettvangi SÍ, að fara í frekari útboð á heilbrigðisþjónustu til einkafyrirtækja sem ríkisreknar stofnanir hafa hingað til séð um?

12. Greint hefur verið frá því að aðstoðarmaður heilbrigðisráðherra muni hefja störf hjá Klíníkinni sem framkvæmdastjóri í byrjun næsta árs. Sast þú fundi með aðstoðarmanninum, sem forstjóri ríkisstofnunarinnar SÍ, meðan hann gegndi því starfi þar sem rætt var heilbrigðiskerfið, útvistun aðgerða frá ríkinu til einkaaðila og tengd mál og eins stefnu ríkisins við veitingu heilbrigðisþjónustu almennt séð? Hvað fór fram á slíkum fundum, ef þeir áttu sér stað, og hvaða upplýsingar, innan úr ríkisstofnuninni SÍ, voru ræddar á þeim?

Kjósa

Hvernig finnst þér þessi grein? Skráðu þig inn til að kjósa.

Deila

Efnisorð

Klíníkin og einkarekstur í heilbrigðiskerfinu

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.

Tengdar greinar