Fyrsti brun ársins varð í Hafnarfirði skömmu eftir miðnætti í nótt. Samkvæmt upplýsingum Heimildarinnar sem fengnar voru hjá nágrönnum á vettvangi valt flugeldaterta á hliðina og innihald hennar skaust inn í bílskúr.
Húsið var mannlaust en nágranni varð var við það sem gerst hafði og gerði slökkviliðinu viðvart, samkvæmt upplýsingum frá nærstöddum íbúum.
Á Facebook-síðu Slökkviliðs höfuðborgarsvæðisins kemur fram að töluvert tjón varð á bílskúrnum. Eldurinn barst þó ekki í íbúðarhúsið.
Lítið var um önnur útköll hjá slökkviliðinu í nótt. Þau voru raunar einungis þrjú til viðbótar „þar sem tilkynnt var um eld í gám og þess háttar.“
Sjúkrabílar á höfuðborgarsvæðinu fóru hins vegar í 64 útköllum, en ekkert útkallanna var vegna flugelda.
Á sjúkrabíla var töluvert að gera en næturvaktin fór í 64 útköll eða jafnmörg og dagvaktin tók. Ekkert útkalla var vegna flugelda og er það gott.
Í tilkynningu frá Hjalta Má Björnssyni, yfirlæknis á bráðamóttöku Landspítala, segir að talsvert hafi verið um það að einstaklingar hafi þurft að leita á bráðamóttöku Landspítala um áramótin vegna flugeldaslysa. Alls komu tólf á deildina frá morgni gamlársdags og fram á fyrsta morgun nýja ársins vegna slíkra áverka sem í flestum tilvikum voru minni háttar.
Hjalti segir að áberandi hafi verið hversu mikilvægt sé að nota hlífðargleraugu ef verið er að skjóta upp flugeldum í nágrenni. „Nokkrir einstaklingar hlutu brunasár í andliti þar sem hlífðargleraugun höfðu augljóslega komið í veg fyrir alvarlegan augnáverka. Einnig voru tilvik þar sem fólk hafði talið sig standa fjarri flugeldum og því ekki verið með hlífðargleraugu en samt orðið fyrir minni háttar augnáverka vegna flugelda. Ættu því öll þau sem stödd eru utandyra þegar verið er að nota flugelda að vera með hlífðargleraugu.“
Í tilkynningunni segir einnig að þrátt fyrir að loftmengun hafi samkvæmt mælingum virst hafa verið langt yfir viðmiðunarmörkum hafi enginn þeirra sem leitaði á bráðamóttöku að loftmengun vegna flugelda væri bein ástæða komunnar.
Athugasemdir