Frá og með 8. janúar hækkar gjaldskrá Strætó. Einn stakur miði með gulu vögnunum um höfuðborgarsvæðið mun þá fara úr 570 kr. upp í 630 kr., en að meðaltali nemur hækkunin á gjaldskránni um 11 prósentum.

Árskort í Strætó hækkar upp í 104 þúsund krónur, en árskort ungmenna, aldraðra og nema munu kosta 52 þúsund krónur. 

Þetta er önnur verðhækkunin sem Strætó tilkynnir um á árinu, en í sumar hækkaði verð að meðaltali um 3,6 prósent og einn miði fór sem dæmi úr 550 krónum upp í 570 krónur. 

Tilkynning um hækkunina barst í dag, en áform um að hækka verð eftir áramót hafó þá legið fyrir frá því að stjórn Strætó tók ákvörðun um hana í haust, en hún var samþykkt um miðjan október þegar eigendafundur Strætó fór fram á vettvangi Samtaka sveitarfélaga á höfuðborgarsvæðinu.

Áhrifa faraldurs gæti enn

Í tilkynningunni frá Strætó kemur fram að litið hafi verið til rekstrarstöðu Strætó við ákvörðunina og að uppsafnaðara áhrifa vegna heimsfaraldursins gæti enn í rekstrinum. 

„Verðhækkunum er einnig ætlað að mæta almennum kostnaðarverðshækkunum hjá Strætó sem og hærri launakostnaði og draga úr þörf á frekari hagræðingu í leiðarkerfi Strætó á höfuðborgarsvæðinu,“ segir í tilkynningu Strætó.

Tekjur undir því sem eigendur stefna að

Eigendastefna Strætó mælir fyrir um að fargjaldatekjur standi undir 40 prósentum af kostnaði við reksturinn. Tekjurnar hafa þó verið nokkuð fjarri því að standa undir því undanfarin ár.

Jóhannes Svavar Rúnarsson framkvæmdastjóri Strætó sagði við Heimildina fyrr á árinu að hlutfall fargjalda af kostnaði hefði hæst farið í 35 prósent á undanförnum árum, og að þrátt fyrir metfjölda innstiga í vagna hefðu fargjaldatekjur Strætó einungis staðið undir tæpum 30 prósentum af rekstrarkostnaði félagsins á fyrstu mánuðum ársins.