Arnar Hjálmsson, formaður Félags íslenskra flugumferðarstjóra segir að það sé aldrei auðvelt að boða til verkfalla, „hvað þá síður að horfa upp á það verða að veruleika.“
Verkfall flugumferðarstjóra hófst á klukkan fjögur í gærnótt eftir að fundi samninganefnda Félags íslenskra flugumferðarstjóra og Samtaka atvinnulífsins lauk án samnings í gærkvöldi. Vinnustöðvunin hafði umtalsverð áhrif á flug þúsunda ferðalanga. Viðræður milli Félags flugumferðarstjóra og Samtaka Atvinnulífsins munu fara fram í dag klukkan þrjú í dag.
Spurður um það hvort hann sé vongóður fyrir næsta fund segist Arnar öllu jafna mæta bjartsýnn á fundina, „en vongóður svona á miðað við hvernig þessu lauk í gær? Já já eigum við ekki bara leyfa okkur að vera það? Við sjáum hvernig þetta þróast,“ segir Arnar.
Flóknar viðræður framundan
Viðræður milli Félags flugumferðarstjóra og Samtaka Atvinnulífsins hafa gengið erfiðlega fyrir sig. Framkvæmdastjóri Samtaka atvinnulífsins hefur gagnrýnt framgöngu flugumferðarstjóra og sagt að aðgerðirnar gætu skemmt fyrir vinnu við að koma á nýrri þjóðarsátt á meðal allra aðila á vinnumarkaði, sem sé vandasamt verk á þessum tímum vegna hárrar verðbólgu og stýrivaxta.
Spurður út í þessa gagnrýni segist formaðurinn vera móttækilegur fyrir því að hlusta á og ræða þá gagnrýni, bætir við að það sem framkvæmdastjóri Samtaka atvinnulífsins virðist ekki hafa áttað „sig á í byrjun er að við erum enn þá í síðustu samningslotu. Við erum að senda út þessa skammtímasamninga núna fyrir okkar félagsmenn. Það var uppleggið, sem að aðrir sömdu um fyrir tæpu ári síðan. Við erum í raun síðastir í þeirri lotu. Hvort að okkar útspil skemmi fyrir því, það verður bara að koma í ljós,“ segir Arnar.
Þá tekur Arnar fram að Félag flugumferðarstjóra hafi opnað á þann möguleika að gera samning til lengri tíma en þær viðræður hafi ekki náð langt. Meðal annars, vegna þess að Samtök atvinnulífsins gátu ekki samþykkt þau skilyrði sem flugumferðarstjórar settu fyrir lengri samning.
Flugumferðarstjórar hafa boðað til verkfalls sex sinnum á níu árum
Sigríður Margrét Oddsdóttir, framkvæmdastjóri Samtaka atvinnulífsins, hefur bent á að á síðastliðnum fimm árum hafi flugumferðarstjórar boðað til þriggja verkfalla. Árið 2021 samþykktu þeir að beita verkfallsaðgerðum, sem var aflýst nokkrum dögum áður en til vinnustöðvunar kom. Árið 2019 boðaði FÍF til vinnustöðvunar í formi þjálfunarbanns sem gilti um alla félagsmenn sem starfa hjá Isavia.
Þá beittu flugumferðarstjórar verkfallsaðgerðum þrjú sumur í röð milli áranna 2014 og 2016, með því að boða til yfirvinnubanns. Árið 2016 samþykkti Alþingi að setja lög á verkfall flugumferðarstjóra þar sem áframhaldandi verkfallsaðgerðir voru bannaðar og gerðardómur skipaður til þess að skera úr um kjaradeiluna.
Laun og kjör flugumferðarstjóra þykja góð
Samkvæmt upplýsingum frá Hagstofu Íslands eru grunnlaun þeirra sem starfa við flugumsjón 915.000 krónur á mánuði. Meðaltal regluleg heildarlaun, eru regluleg laun að viðbættum launum fyrir mælda yfirvinnu, tæplega ein og hálf milljón krónu á mánuði.
Spurður út í umræðu sem farið hefur stað um laun flugumferðastjóra segir Arnar að hafa verði í huga þá miklu yfirvinnu sem flugumferðastjórar sinna og segir ráðamenn hjá Isavia geta vottað til um það.
Til samanburðar voru föst laun nýráðinna flugþjóna, árið 2020, í kringum 290 þúsund krónur á mánuði með vaktaálagi. Flugþjónar með tíu ára starfsreynslu voru með rétt yfir 400 hundruð þúsund krónur á mánuði.
Athugasemdir