„Atvinnulífið er ekki að fara að byrja á því að hafa vinnuna til tvö á daginn, en það er svolítið það sem þarf til þess að þetta gangi upp hjá leikskólunum,“ segir móðir barns á leikskóla í Hafnarfirði. Hún er einnig starfsmaður á leikskóla í sveitarfélaginu. „Ég held að sveitarfélagið sé að þrýsta á fyrirtæki og atvinnulífið að minnka vinnutíma fólks,“ segir hún. 

Breytingarnar sem Hafnarfjarðabær boðaði á leikskólastarfi í byrjun desember eru m.a. skipting leikskóladagsins upp í kennslu- og frístundastarf og lækkun leikskólagjalda fyrir sex tíma vistun. Enn fremur verður leikskóladagatalið og dagatal grunnskólanna samræmt og innleiddur sveigjanlegri dvalartíma fyrir börn.

Þær aðgerðir sem Hafnarfjarðarbær hefur nú þegar hrint í framkvæmd eru 36 stunda vinnuvika fyrir allt starfsfólk leikskólanna, aukið samræmi milli fyrstu skólastiganna, heimgreiðslur til foreldra og greiðsla stofn- og aðstöðustyrkja til dagforeldra.

Verandi starfsmaður segir móðirin breytingarnar leggjast vel í sig. Henni þykir þetta vera í takt við þá þróun sem sé að eiga sér stað í samfélaginu, það er að auka samverustundir fjölskyldna. Spurð hvort hún fengi sjálf sex tíma vinnudag sagði hún það eitthvað sem ekki væri búið að ræða.  

Bærinn segir litla eftirspurn eftir lengri vistun

Leikskólar Hafnarfjarðar munu loka klukkan hálf fimm, þar sem ekki mun standa foreldrum til boða að skrá börnin sín í vist til klukkan fimm síðdegis. Í svari við fyrirspurn Heimildarinnar til Hafnarfjarðarbæjar segir að fá börn séu skráð til fimm á daginn. Þessi breyting ætti því ekki að hafa áhrif á marga foreldra.

Faðir leikskólabarns í Hafnarfirði segir þó í samtali við Heimildina að þegar hann hafi reynt að nýta sér þann möguleika að vera með barn til fimm á leikskólanum hafi honum verið tjáð að það væru svo fá börn skráð til fimm að barnið hans yrði nánast það eina. Að hans sögn fengu foreldrar annarra barna sömu svör.

Heimildin sendi Hafnarfjarðabæ fyrirspurn um hve mörg börn væru í dag vistuð til fimm. Hafnarfjarðarbær segir þau aðeins vera fjögur sem eru vistuð lengur en til hálf fimm. Þau eru öll vistuð á sama leikskólanum og verða stjórnendur þar í góðu samráði við þá foreldra.

Leikskólagjöld hækka stuttu eftir tilkynningu um lækkun

Í desember barst foreldrum tölvupóstur þar sem tilkynnt var um 9,9% hækkun á dvalargjöldum í leikskólum Hafnarfjarðar. Fæðisgjaldið ætti að haldast óbreytt en leikskólagjaldið fyrir átta tíma vistun að hækka um 7,2%. Hækkunin á leikskólagjöldum var ákveðin í bæjarstjórn í byrjun desember.

Fyrr í desembermánuði hafði þó borist fréttatilkynning sem boðaði umtalsverða lækkun á leikskólagjöldum fyrir sex tíma vistun og enga breytingu á gjöldum fyrir 8 tíma vistun. 

Í tilkynningunni sagði: „Leikskólagjöld fyrir 8 klukkustundir á dag haldast óbreytt. Leikskólagjöld fyrir 6 klukkustunda vistun á dag lækka umtalsvert eða sem jafngildir 30% af heildarkostnaði af 40 klukkustunda vistun.“ Upplýsingarnar frá Hafnarfjarðarbæ eru því nokkuð mótsagnakenndar. Áðurnefnd fréttatilkynning er nú horfin af vef bæjarins.

Faglærðu starfsfólki fjölgar

Faglærðum starfsmönnum á leikskólum Hafnarfjarðarbæjar hefur fjölgað um 2,9% frá því í apríl 2022. Starfsfólk leikskólanna með aðra háskólamenntun hefur fjölgað um 3%. Í svari Hafnarfjarðarbæjar til Heimildarinnar um hvernig bærinn ætli að fjölga fagmenntuðu fólki segir að allar stöður séu auglýstar. „Svo trúum við því að ánægt starfsfólk láti vini og félaga í faginu vita og þannig er það kannski ekki síður upplifun af umbreytingum og breyttu starfsumhverfi og leikskólastarfi sem er að skila sér.“

Í fréttatilkynningu Hafnarfjarðarbæjar segir að markmið aðgerðanna sé að „auka sveigjanleika innan skóladagsins allt árið um kring og fjölga fagfólki í leikskólum bæjarins.“